Adam óltirgen ózbekstandyq 15 jyldan keıin Almaty oblysynan tabyldy
TALDYQORǴAN. QazAqparat - Almaty oblysynda adam óltirgeni úshin 15 jyl izdeýde bolǵan Ózbekstan azamaty ustaldy, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, quramynda esirtki zaty bar ósimdikterdi ósirgeni úshin ustalǵan Ózbekstan azamaty qamaýdan qashqan, kisi óltirgeni úshin izdeýde júrgeni anyqtaldy.
Qarasaı aýdanynyń polıtsııa qyzmetkerleri jedel is-sharalardy júrgizý barysynda quramynda esirtki zaty bar ósimdikterdi zańsyz ósirý deregin anyqtaǵan. Atalǵan derekke baılanysty QR QK-niń 300-babynyń 1-bóligine sáıkes qylmystyq is qozǵaldy.
Onymen qosa, ózimen birge jeke basyn kýálandyratyn qujattary joq kúdikti esirtkilik masań kúıde bolǵan. Ustaý kezinde agressıvti minez kórsetken. Asúı pyshaǵyn alyp, ózine-ózi qol jumsaıtynyn aıtqan. Alaıda, jedel ýákilder ony birden beıtaraptandyryp, Qarasaı aýdanynyń polıtsııa basqarmasyna jetkizgen.
Jeke basyn anyqtaý barysynda, kúdiktiniń ózgeniń atyn paıdalanǵany belgili boldy. Sebebi alynǵan fotosýret onyń beınesine sáıkes kelmegen. Derekqor boıynsha saýsaq izderin tekserý kezinde Ózbekstan quqyq qorǵaý organdary adam óltirgeni jáne qamaýdan qashqany úshin ony izdeýge jarııalaǵany anyqtaldy. Ózbekstannyń 44 jastaǵy azamaty 2005 jyldyń 3 maýsymynan bastap izdeýde bolǵan.
Qamaýǵa alý týraly sanktsııa berilip, ol tergeý oqshaýlaǵyshyna jetkizildi. Jasalǵan qylmysy úshin jaýapkershilik týraly másele aıqyndalǵannan keıin, ony Ózbekstan eline ekstradıtsııalaý sheshiletin bolady.
