Adam óltirgen kúdikti qamaýda – Almaty PD basshysy
ALMATY. QazAqparat – Almaty Polıtsııa departamenti adam óltirdi dep ustalǵan ákimdik júrgizýshisi týraly málimet jarııalady, dep habarlaıdy QazAqparat tilshisi.
Kúdikti adamǵa qatysty Alataý aýdandyq PB QR QK 99-baby boıynsha sotqa deıingi tergeý isin bastady.
«Kúdikti izi sýymaı ustaldy. Konvoı kómegimen ustalyp bólimshege jetkizildi. Sot sanktsııasymen qamaýda ustaý týraly bultartpaý sharasy qabyldandy. Tergeý sharasy barynsha ashyq, ádil ótip jatyr. Tergeý barysy meniń baqylaýymda», - dedi qalalyq PD basshysy Qanat Taımerdenov.
Aıta ketý kerek, búgin Almaty turǵyny Ajar Ábdiresheva qala ákimi Baqytjan Saǵyntaevqa kúıeýiniń ólimine qatysty vıdeoúndeý jarııalaǵan bolatyn.
Keıin qala ákimi Baqytjan Saǵyntaev bul isti jeke baqylaýyna alyp , PD basshysyna isti obektıvti tergeýdi tapsyrdy.
Al ákimdik kúdiktiniń ákimdik qyzmetkeri nemese memlekettik qyzmetshi sanatyna jatpaıtynyn aıtty.
