Adam óltirdi degen kúdikpen izdeýde bolǵan ózbekstandyq Aqtóbede ustaldy
AQTÓBE. QazAqparat – Polıtsııa adam óltirdi degen kúdikpen izdeýde bolǵan Ózbekstan azamatyn ustady, dep habarlaıdy QazAqparat tilshisi.
Aqtóbelik polıtseıler kisi óltirgeni úshin izdeýde júrgen Ózbekstan azamatyn ustady. 35 jastaǵy kúdiktini «Samara-Shymkent» tas jolynda patrýldik polıtsııa rotasynyń jasaǵy qolǵa túsirdi. Ol Shymkentten Aqtóbege qaraı jol tartqan. Polıtsııa qyzmetkerleri onyń qolyndaǵy qapshyqtan kúdiktenip, toqtatty.
«Ózbekstan azamatynyń qolyndaǵy qapshyqta jeke zattarynan basqa, buzaýdyń basy men eti tabylǵan. Shymkent qalasynan Yrǵyz aýdanyna qaraı júrip, jolda jaıylyp júrgen buzaýdy jasyryn túrde urlap ketken. Soıyp, ettiń bir bóligin jáne maldyń basyn qapshyqqa salyp alǵan. Ustalǵan azamat óz áreketin moıyndady. Kúdiktiniń jeke basyn tekserý kezinde polıtsııa qyzmetkerleri 2016 jyldan beri izdeýde júrgenin bildi. Almaty oblysynyń polıtsııa departamentiniń aýyr qylmys jasaǵany úshin halyqaralyq izdeý jarııalanǵany anyqtaldy. Kúdikti ustaldy jáne ýaqytsha ustaý ızolıatoryna qamaldy. Sotqa deıingi tergeý júrgizilýde», - dep habarlady oblystyq PD baspasóz qyzmetiniń jetekshisi Erbolat Sarqulov.
