Adam ólimine sebepshi qostanaılyq júrgizýshi shartty túrde sottaldy
QOSTANAI. QazAqparat - Qostanaı oblysy Naýyrzym aýdandyq soty 21 jastaǵy qyzdyń ólimine sebepshi bolǵan qostanaılyq júrgizýshini shartty túrde sottady, dep habarlaıdy QazAqparat oblystyq sottyń baspasóz qyzmetine silteme jasap.
Qaıǵyly oqıǵa 2017 jylǵy 2 qarashada Qarameńdi aýylynda bolǵan. Kúdikti dostarymen alkogoldik ishimdik iship, Áýlıekól baǵytyndaǵy tas jolǵa shyǵady.
«Ol rýlge ıe bola almaı, kólik aýdarylyp ketken. Saldarynan 21 jastaǵy qyz oqıǵa ornynda qaza tapty. Sot talqylaýy barysynda prokýror men aıyptalýshy kináni moıyndaý týraly shart túrindegi protsessýaldy kelisimge keldi. Kúdikti aıybyn tolyq moıyndap, alǵa tartylǵan derekterdi rastap, qylmyspen jasalǵan zalaldyń ornyn tolyq toltyrýǵa kóndi», - delingen habarlamada.
Naýyrzym aýdandyq soty júrgizýshini kináli dep taýyp, 2 jyl 6 aı merzimge shartty túrde bas bostandyǵynan aıyrdy. QR KQ 63-babyna sáıkes, kúdiktige probatsııalyq baqylaý ornatyldy.
