Adam ólimine alyp kelgen oqıǵada áreketsizdik tanytqan polıtseıge sot úkimi shyqty

QYZYLORDA. QazAqparat - Qyzylorda qalasynda adam ólimine alyp kelgen oqıǵa barysynda qyzmettik áreketsizdik kórsetken polıtseıge qatysty sot úkimi shyqty, dep habarlaıdy QazAqparat tilshisi.

Ótken jyldyń qyrkúıek aıynda Qyzylorda qalasynda 29 jastaǵy er adam zańdy nekedegi 27 jastaǵy áıelin mas kúıinde belgisiz sebeppen uryp-soqqan. Saldarynan azamatsha alǵan aýyr dene jaraqatynan qaıtys boldy.​

Bul qylmystyq is Qyzylorda qalasynyń №2 sotynda qaraldy. Sottalýshy Q. QR Qylmystyq kodeksiniń 370-babynyń 4-bóliginiń 1)-tarmaǵynda /quqyq qorǵaý organynyń qyzmetkeri bola tura, basqa adamdar úshin paıda men artyqshylyqtar alý jáne basqa adamdarǵa zııan keltirý maqsatynda óziniń qyzmettik mindetterin oryndamaı, sonyń saldarynan adamnyń quqyqtary men zańdy múddelerin aýyr zardaptarǵa alyp kelip, qyzmettegi áreketsizdik jaǵdaıy boıynsha jazaǵa tartyldy.

Týǵan kún keshin toılaý barysynda kafe aldynda Sh., O. jáne S. arasynda aıqaı-shý bolǵan. Túngi mezgilde turǵyndardyń qalypty demalysyna kedergi jasalyp, qoǵamdyq tynyshtyq buzylǵan.

«Oqıǵa ornyna kezekshilikte júrgen Q. túngi mezgilde qoǵamdyq tynyshtyqty buzǵan azamattardy ákimshilik jaýaptylyqqa tartpaǵan. Onyń ornyna, ózine júktelgen qyzmettik mindettemelerdi oryndamaı, áreketsizdik tanytqan. Quqyq buzýshylyqtyń aldyn alý, boldyrmaý, anyqtaý, jaýapqa tartý sharalaryn atqarmaǵan. Qyzmettik áreketsizdiktiń saldary Sh.A.-nyń ólimine alyp kelgen. Sottalýshy Q-nyń kinási, jábirlenýshi jáne kýálerdiń jaýaptarymen, bettestirý hattamalarymen, JBO-nan alynǵan beınejazbamen jáne sot-medıtsınalyq saraptama qorytyndysymen, JTÁ-3 nátıjesimen, uıaly telefon detalızatsııasymen jáne basqa da istegi jınaqtalǵan qujattarmen tolyq dáleldendi», - dep málim etti Qyzylorda oblystyq sotynan.

Memlekettik aıyptaýshy sottan sottalýshy Q.-ny 6 jylǵa bas bostandyǵynan aıyrýdy, jábirlenýshiniń ókili jáne qorǵaýshysy 7 jylǵa bas bostandyǵynan aıyrýdy, materıaldyq jáne moraldyq shyǵyn óndirýdi surady.

Sottalýshy jáne onyń qorǵaýshysy aqtaý jóninde usynysyn jetkizdi.

«Qylmystyq jaýaptylyqty jeńildetetin mán-jaılar anyqtalmaǵan. Ózi bergen kásibı antyn buza otyryp, qylmystyq quqyq buzýshylyq jasaýyn jaýaptylyǵy men jazasyn aýyrlatatyn mán-jaılar dep tapty.

Sottalýshy Q. kináli dep tabylyp, oǵan 5 (bes) jyl merzimge bas bostandyǵynan aıyrý jazasy taǵaıyndaldy. Budan bólek, sottalýshy Q. memlekettik uıymdarda laýazymdardy atqarýǵa ómir boıyna aıyryldy. Azamattyq talapkerdiń talap aryzy ishinara qanaǵattandyryldy. Sot úkimi zańdy kúshine enbegen», - dep tolyqtyrdy oblystyq sottan.