Adam ólimine ákep soqqan Tarazdaǵy tóbeles vıdeoǵa túsip qaldy
TARAZ. QazAqparat - Jambyldyq tártip saqshylary áleýmettik jelilerde taraǵan tóbeles týraly vıdeoǵa pikir bildirdi, dep habarlaıdy «QazAqparat» HAA tilshisi.
Vıdeoǵa túsip qalǵan kóriniste Tóle bı - Fýrmanov kósheleriniń qıylysynda bes mashına toqtap, bireýinen adamdy sýryp alyp shyǵyp bes adam soqqynyń astyna alady. Odan keıin «Golf» avtomobıli kelip tóbeleske qatysýshylardyń birin qaǵyp óte shyǵady.
«Sińilimniń kúıeýin óltirip ketti» dep jazady, pikir qaldyrǵan áleýmettik jeli qoldanýshylardyń biri.
Jambyl oblystyq ІІD baspasóz qyzmeti habarlaǵandaı, 1 qańtar kúni túngi saǵat bir jarym shamasynda Taraz qalasynyń jedel járdem aýrýhanasyna 29 jastaǵy jigit jetkizilgen. Patsıent kelesi kúni esin jımastan jan saqtaý bóliminde kóz jumdy.
«Atalǵan fakty boıynsha QR QK 99-baby 1-bóligi boıynsha sotqa deıingi tergeý jumystary júrgizilýde. Anyqtalǵandaı, jábirlenýshiniń ólimine «Folksvagen Golf-3» kóliginiń ádeıi kelip soǵylýy sebep bolyp otyr. Kúdiktiniń aty-jóni anyqtaldy. Ol Taraz qalasynyń turǵyny. Qazir polıtseıler kúdiktini izdestirý, qolǵa túsirý jumystaryn jalǵastyrýda»,-delingen vedomstvo taratqan málimdemede.
Sonymen qatar, «VAZ-2114» kóliginde bolǵan tórt adamǵa qatysty buzaqylyq faktiler de nazarǵa alynyp, tóbeleske qatysqan adamdardyń barlyǵyn tekserý sharalary júrgizilmek.
