Adam ólimimen aıaqtalǵan jastar arasyndaǵy janjal: Kolledj stýdenti sottaldy
ShYMKENT. QazAqparat - Ońtústik Qazaqstan oblysynda adam óltirip, qashyp júrgen turǵyn 11 jyl 3 aıǵa sottaldy. Ordabasy aýdandyq soty kisi ólimine kináli jigitti jazasyn qatań tártiptegi kolonııada óteýge úkim shyǵardy, dep habarlaıdy QazAqparat tilshisi.
Oblystyq ІІD baspasóz qyzmetiniń málimetinshe, qylmysty oqıǵa ótken jyldyń 27 qarashasynda túngi ýaqytta bolǵan.
«Ordabasy aýdandyq ishki ister basqarmasynyń kezekshi bólimine 22 jastaǵy jigittiń aýrýhanaǵa barar jolda qaıtys bolǵan týraly habarlama kelip túsken. Oqıǵa ornyna jetken polıtseıler bir top jastardyń aralarynda janjal týyndaǵanyn anyqtady. Belgisiz bireý 22 jastaǵy jigitke pyshaqpen dene jaraqatyn salyp, oqıǵa ornynan boı tasalaǵan. Alǵan dene jaraqatynyń saldarynan aýrýhanaǵa barar jolda joǵary oqý oryndarynyń sońǵy kýrs stýdenti kóz jumdy. Adam ólimine sebepshi bolǵan qylmyskerdi tabý maqsatynda tártip saqshylarynan jedel-tergeý tobyn qurylyp, ony izdeý sharalary júrgizildi. Kúdikti 1995 jyly týǵan kolledjdiń stýdenti ári osy aýdannyń turǵyny ekeni belgili boldy», delingen habarlamada.
Jedel iz kesýshilerge seziktini qolǵa túsirý ońaıǵa soqpaǵan. Sebebi izdeýde júrgen jigitti týystary Maqtaral aýdanynda júr dese, artynsha onyń Almaty qalasyna qashyp ketkeni anyqtalǵan. Aqshasy taýsylǵan kúdikti qaıtyp Ordabasy aýdanyna oralǵan. Polıtseıler ony tek 1 jeltoqsanda qolǵa túsirdi. Tergeý kezinde ol óziniń jasaǵan qylmysyn tolyq moıyndaǵan. Ári bolǵan oqıǵa toıhanalardyń birinde ornalasqan beınekameraǵa túsip qalǵan bolatyn. Aıǵaqty zat retinde kúdiktiniń ózi oqıǵa ornynan qashyp bara jatyp, jol boıyna laqtyryp ketken qarý da tabylǵan edi.
