Adam ólimimen aıaqtalǵan kólik apaty: Almaty oblysynda qashyp ketken júrgizýshi ustaldy
TALDYQORǴAN. QazAqparat – Almaty oblysynda adam ólimimen aıaqtalǵan kólik apatynan qashyp ketken 44 jastaǵy júrgizýshi ustaldy, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, atalǵan fakti 6 qarasha kúni Kerbulaq aýdanynda tirkeldi. Saryózek aýylynyń jergilikti turǵyny «Aýdı-100» kóligimen baǵanaǵa soǵylǵan. Saldarynan 44 jastaǵy er adam kóz jumyp, taǵy bir jolaýshy túrli dene jaraqatymen aýyr halde aýrýhanaǵa jetkizilgen.
«Kólik júrgizýshisi oqıǵa ornynan qashyp ketip, artynsha polıtseıler ony úıinde ustady. Anyqtalǵandaı, jol-kólik oqıǵasy bolǵanda júrgizýshi ishimdik ishken. Ol arnaıy medıtsınalyq tekserý kezinde anyqtaldy. Endi kúdikti oqıǵa ornynan qashyp ketkeni úshin de zań aldynda jaýap beredi»,- dedi atalǵan vedomstvodan.
Atalǵan fakti boıynsha qazir kúdiktiniń ústinen QR QK 345-baby 3-tarmaǵy jáne QR QK 347-babyna sáıkes sotqa deıingi tergeý júrip jatyr.
