Adam minez-qulqyn manıpýlıatsııalaı alatyn JI qurýǵa tyıym salynbaq – zań jobasy
ASTANA. KAZINFORM — Búgin Parlament Májilisinde «Jasandy ıntellekt týraly» zań jobasy men ilespe qujat tanystyryldy.
— Memleket basshysy atalǵan zań jobalaryn iske asyrýdyń mańyzdylyǵyn 2024 jylǵy 2 qyrkúıektegi Qazaqstan halqyna Joldaýynda jáne bıylǵy Úkimettiń keńeıtilgen otyrysynda sóılegen sózinde atap ótti. Zań jobalary jasandy ıntellekt tehnologııalaryn (júıelerin) paıdalanýdyń biryńǵaı quqyqtyq bazasyn belgileýge baǵyttalǵan, — dedi Májilis depýtaty Nurtaı Sabılıanov.
Negizgi zań jobasynda:
— jasandy ıntellekt salasyndaǵy retteýdiń, ashyqtyq pen qaýipsizdikti qamtamasyz etýdiń quqyqtyq jáne uıymdastyrýshylyq negizderi aıqadalady. Táýekelderdiń deńgeıi boıynsha júeıelerdi jikteý engizilip, derbes derekterdi qorǵaý kúsheıtiledi;
— memlekettik organdar men kvazımemlekettik uıymdardyń jasandy ıntellekt tehnologııalaryn paıdalaný erekshelikteri qarastyrylǵan;
— jasandy ıntellekt salasyndaǵy qatynastar sýbektileriniń quqyqtary men mindetteri aıqyndalady.
— Budan basqa, ilespe zań jobalary jasandy ıntellekt júıelerin paıdalana otyryp jasalǵan ónimderge qatysty tutynýshylardyń quqyqtaryn jáne ol júıelermen paıdalanylatyn jeke derekterdi qorǵaýǵa, jasandy ıntellekt júıeleri arqyly jasalǵan buqaralyq aqparat quraldary ónimderiniń qaýipsizdigin qamtamasyz etýge baǵyttalǵan. Sondaı-aq jasandy ıntellekt júıeleriniń ıeleri úshin ákimshilik jaýapkershilik qarastyrylǵan, — dedi ol.
Óz kezeginde Májilis depýtaty Ekaterına Smyshlıaeva zań jobasynyń negizgi jańalyqtaryn atap ótti.
Táýekel deńgeıi boıynsha JI júıelerin jikteýdi engizý — zań jobasy jasandy ıntellekt júıelerin mınımaldy, ortasha jáne joǵary táýekelge bóledi, bul olardyń jumysyn paıdalanýshylardyń, qoǵam men memlekettiń qaýipsizdigine yqtımal áser etýine baılanysty retteýge múmkindik beredi.
Budan bólek, tolyq avtonomdy JI júıelerine tyıym salý eskerilgen. Qazaqstan aýmaǵynda adamnyń aralasýynsyz sheshim qabyldaıtyn júıelerdi qurýǵa jáne engizýge tyıym salynady, bul rettelmeıtin saldardyń yqtımaldyǵyn azaıtady.
Ulttyq jasan ıntellekt platformasyn qurý — osy saladaǵy otandyq sheshimderdi damytýǵa yqpal etetin, ıaǵnı basqarylatyn ortada JI júıelerin ázirleý, oqytý jáne synaqtan ótkizý úshin memlekettik tehnologııalyq ınfraqurylym qalyptasyp keledi.
Ekaterına Smyshlıaevanyń sózine qaraǵanda, jeke derekterdi qorǵaýǵa ekpin qoıylyp otyr. Adamdardy áleýmettik, bıometrııalyq jáne minez-qulyq erekshelikterine qaraı baǵalaý úshin JI qoldanýǵa qatań shekteý engiziledi, sondaı-aq adam minez-qulqyn manıpýlıatsııalaı alatyn JI qurýǵa jáne paıdalanýǵa tyıym salynady.
Buǵan deıin jasandy ıntellekt mamandyqtarǵa qalaı áser etetinin jazǵan edik.