Adam qutqarýǵa attanatyn ushaqtar avtokólik janarmaıyn quıyp júr – Májilis depýtaty
ASTANA. KAZINFORM – Sanıtarlyq avıatsııadan ábden eskirgen AN-2 jáne ıAK-40 ushaqtaryn alyp tastaý kerek. Bul týraly Premer-Mınıstrdiń atyna depýtattyq saýal joldaǵan Nartaı Sársenǵalıv aıtty.
«Búgin medıtsınadaǵy taǵy bir sumdyqty sóz etpekpin. Sebebi bizdegi jedel járdemniń ózine jedel járdem kerek eken. Sóz - sanavıatsııa týraly. Mamyr aıynda Qostanaı oblysynda sanıtarlyq reıstiń sý ústinde tóbesimen tóńkerilip jatqanyn kópshilik kórdi. Alystaǵy aǵaıyndy emdeýge, oraıyn taýyp ortalyqqa ákelýge attanǵan ushaqtyń sıqy sol. «Aýrýdan kelmegen ajalym avıatsııadan kele me» dep qorqady endi qarapaıym el. Hosh, Qostanaıda sýǵa qonamyn dep tóbesimen tóńkerilip túsken sanavıatsııaǵa tıesili AN-2 ushaǵy biraz bylyqtyń betin ashty. Qazbalap kep jibergende jantúrshigerlik jaıttar áshkere boldy. 2019-2023 jyldary sanıtarlyq avıatsııa jelisinde 11 oqys oqıǵa, 5 avıatsııalyq oqıǵa tirkelgen. Sonyń teń jartysy AN-2 ushaǵynyń enshisinde», - dedi ol Májilistiń jalpy otyrysynda.
Onyń dereginshe, 2023 jyly sanıtarlyq avıatsııaǵa 11,9 mlrd teńge jumsalǵan. Al Qazaqstandaǵy sanavıatsııada qoldanylatyn AN-2 – keńes kezinde, ıakı 1947 jyldan bastap shyqqan ushaq. Al ıAK-40 1966-1981 jyldary qurastyrylǵan áýe kóligi.
«Tabıǵı baılyqtyń bári tabanynyń astynda jatqan elimizdiń sanıtarlyq reısterinde ortasha qyzmet etý merzimi 40 jyldan asqan ushaqtar qatynaıdy. Eń soraqysy Qazaqstannyń sanavıatsııadaǵy AN-2 ushaqtary AI-95 markaly avtomobıl benzınimen ushyp júr. Oılap kórińizder, aspanmen adam qutqarýǵa attanatyn ushaqqa jerde júretin avtokóliktiń janarmaıyn quıyp júrgen el atandyq. Osydan keıin sanıtarlyq avıatsııadaǵy apattarǵa eshkim tań qala qoımas», - dedi Májilis depýtaty.
Depýtattyń atap ótýinshe, 2023 jyly «Ulttyq shuǵyl medıtsınany úılestirý ortalyǵy» shalǵaıdaǵy naýqasqa jedel jetý úshin 11 áýe kompanııasymen shart jasasqan. Biraq sońǵy 4 jyldaǵy ushýlardyń 70 paıyzy AN-2 jáne ıAK-40 ushaqtarymen júzege asqan. AN-2 ushaǵy 4 saǵatta jetetin jerge,paıdalaný merzimi 10 jyldan asqan ES-145 tikushaǵy 2,5 saǵatta jetedi. Soǵan qaramastan eski ushaqtardyń tarıfi jyl sanap ósip barady. Mysaly, 2015 jyly AN-2 ushaǵynyń 1 saǵattyq ushý tarıfi – 219 250 teńge bolsa, byltyr 328 myń teńgege jetken.
Osyǵan oraı Nartaı Sársenǵlıev Úkimet basshysyna myndaı usynystar berdi:
1. Sanıtarlyq avıatsııadan ábden eskirgen AN-2 jáne ıAK-40 ushaqtaryn alyp tastaý kerek. Onyń ornyna álemdik standartqa saı zamanaýı ushaqtar men tikushaqtardy paıdalaný qajet.
2. Sanıtarlyq avıatsııaǵa qajet ushaqtardy usynatyn áýe kompanııalarymen shart jasasqanda eń arzan tarıfti bekitý týraly tártipti qaıta qaraý kerek. Áıtpese eski ushaqtardan qutyla almaımyz, al bul óz kezeginde onsyzda aýyr dertke shaldyqqan adamdy azaptaý sanalady.
3. Aldyńǵy usynystar júzege asqanǵa deıin qazir elimizdiń sanıtarlyq avıatsııasynda ushyp júrgen AN-2 ushaqtaryna avıatsııalyq janarmaı quıýdy qamtamassyz etý kerek. Sebebi avtokóliktiń benzınin quıǵan ushaqtyń alysqa ushpaıtynyna kóz jetti.
