Adam quqyqtaryn qorǵaý salasyndaǵy ulttyq is-qımyldar josparynyń júzege asý barysy talqylanbaq
ASTANA. 16 aqpan. QazAqparat /Aınur Kenebaeva/ - 2011 jyldyń 18 aqpany - 30 naýryzy aralyǵynda QR Ádilet mınıstrligi Gollandııa Elshiliginiń jáne BUU Joǵarǵy komıssary basqaramasynyń qodaýymen
Adam quqyqtaryn qorǵaý salasyndaǵy 2009-2012 jyldarǵa arnalǵan ulttyq is-qımyldar jospary men Ámbebap merzimdik sholý usynystarynyń oryndalý barysyn talqylaý boıynsha dóńgelek ústelder ótkizbek.
Ámbebap merzimdik sholý - BUU-ǵa qatysýshy-memleketterdiń adam quqyqtaryn qorǵaý salasyndaǵy jaǵdaıyn 4 jylda bir ret qarastyrýdy kózdeıtin adam quqyqtary jónindegi BUU Keńesiniń retteýshi mehanızmi. Qazaqstan Ámbebap merzimdik sholýdan 2010 jyly tuńǵysh ret ótken bolatyn. Sholý qujattaryna qatysty tolyq málimetti adam quqyqtary jónindegi BUU Joǵarǵy komıssary basqaramasynyń saıtynan http://www.ohchr.org/EN/HRBodies/UPR/PAGES/KZSession7.aspx alýǵa bolady.
Adam quqyqtaryn qorǵaý salasyndaǵy 2009-2012 jyldarǵa arnalǵan ulttyq is-qımyldar jospary zańnamany, zańdy qoldaný tájirıbesin, adam quqyqtaryn qorǵaýdyń ulttyq júıesin jetildirýdiń naqty qadamdaryn aıqyndaıtyn baǵdarlama bolyp tabylady.
Ótkiziletin dóńgelek ústelderdiń negizgi maqsaty - azamattardy adam quqyqtary salasynda júrgizilip jatqan saıasat baǵyttarymen tanystyrý. Qatysýshylar nazaryna Ámbebap merzimdik sholýdy júzege asyrý boıynsha ázirlengen Úkimettiń is-qımyldar jospary usynylmaq. Azamattyq qoǵam usynystaryn eskere otyryp tolyqqandy daıyndalǵan is-qımyldar josparynyń sońǵy nusqasy 2011 jyldyń sáýir aıyna josparlanǵan qorytyndy kezdesýde jarııa etilmek.
Dóńgelek ústel jumysyna ókiletti memlekettik organdardyń, jergilikti bılik organdarynyń, saıası partııalardyń, úkimettik emes jáne qoǵamdyq uıymdardyń ókilderi qatysady dep kútilýde.
