Adam quqyqtary jónindegi ýákildiń qyzmetin kim qarjylandyrady

NUR-SULTAN. QazAqparat – Májilis depýtaty Anatolıı Boıchın adam quqyqtary jónindegi ýákildiń qyzmetin qyzmetin qarjylandyrýdyń aıryqsha tártibin engizý máselesin kóterdi, dep habarlaıdy QazAqparat tilshisi.

Májilis depýtatynyń aıtýynsha, adam quqyqtary jónindegi ýákildiń qyzmeti jandanǵan 8 aıdyń ishinde bir de bir óńirde ókildikteri ashylmaǵan.

Al buǵan qarjylandyrý máselesiniń zańnamada naqty pysyqtalmaýy kedergi keltirip otyr.

«Jańa Konstıtýtsııalyq zańda adam quqyqtary jónindegi ýákildiń qyzmetin jáne onyń óńirlerdegi ókildikterin qarjylandyrýdyń aıryqsha tártibi bolǵanyna qalaı qaraısyz? Bul onyń memlekettik qurylymdardan qarjylaı táýelsizdigin qamtamasyz eter edi», - dep surady depýtat Qarjy mınıstrliginiń ókilinen.

QR Qarjy vıtse-mınıstri Dáýren Temirbekovtiń sózine qaraǵanda, adam quqyqtary jónindegi ýákildiń qyzmetin qarjylandyrý máselesi Bıýdjet týralyz zań arqyly retteledi.

«Óńirlik ókildikterdi qarjylandyrý máselesi bıylǵy respýblıkalyq bıýdjetti naqtylaý kezinde pysyqtalǵan. Qarjylandyrý 1 shildeden bastap ashylatyny qarastyrylǵan. Al 2023-25 jyldardaǵy shyǵynnyń bári atalǵan jyldarǵa arnalǵan bıýdjet jobasynda túgel maquldanǵan», -dedi Dáýren Temirbekov.

Aıtýynsha, dál qazir atalǵan ombýdsmenniń qyzmetin derbes qarjylandyrý qoldanystaǵy bıýdjet saıasatyna qaıshy.

«Al aıryqsha qarjylandyrý tártibi týraly aıtsaq, ondaı aıryqsha tártip bıýdjet saıasatynyń qaǵıdattaryna qaıshy. Biraq Prezıdenttiń keıingi Joldaýyn iske asyrý aıasynda Úkimet bıýdjetti basqarýdan nátıjeni basqarý tásiline kóshýdi qolǵa aldy. Salalyq bıýdjet elementteri engiziledi. Jaýapkershilik artady. Jalpy búkil memlekettik organdardyń bıýdjetin josparlaý, bólý tártibi qaıta qaralady», - dedi vıtse mınıstr.