Adam quqyqtary jónindegi ýákildiń áleýetin nyǵaıtýǵa múmkindik jasalady - Májilis
NUR-SULTAN. QazAqparat – BUU qaǵıdattary sáıkes keletin arnaıy zańnyń qabyldanýy Adam quqyqtary jónindegi ýákilge quqyq qorǵaý rásimderine tolyqqandy qatysýǵa múmkindik beredi. Búgin Májilistegi «Adam quqyqtary jónindegi ýákildiń quqyqtyq mártebesi jáne táýelsizdiginiń kepildikteri» taqyrybyndaǵy dóńgelek ústel otyrysynda Májilis tóraǵasynyń orynbasary Balaım Kesebaeva osylaı aıtty, dep habarlaıdy QazAqparat tilshisi.
«2021 jylǵy 15 qańtarda Memleket basshysy Qasym-Jomart Toqaev jetinshi saılanǵan Parlamenttiń birinshi sessııasynyń ashylýynda sóılegen sózinde adam quqyqtaryn qorǵaý memlekettik saıasattyń mańyzdy basymdyǵy ekenin taǵy da eske salyp ótti. Osy turǵyda ol jumys istep turǵan Ombýdsmen ınstıtýty áli de óziniń áleýetin tolyq ashpaǵanyn atap ótip, arnaıy zań qabyldaýdy jáne Adam quqyqtary jónindegi ýákildiń apparatyn, tipti onyń óńirlik ókildikterin qurýǵa deıin nyǵaıtýdy tapsyrdy. Birinshi kezekte tıisti zań jobalarynyń toptamasyn ázirleý arqyly osy tapsyrmany iske asyrý jóninde bastama jasaǵan QR Parlamentiniń depýtattaryna, sondaı-aq Zańnama jáne sot-quqyqtyq reforma komıtetine múshe depýtattarǵa jáne Adam quqyqtary jónindegi ulttyq ortalyqqa osyndaı ózekti taqyrypqa arnalǵan is-sharany uıymdastyrǵany úshin alǵysymdy bildirgim keledi», - dedi B. Kesebaeva.
Onyń aıtýynsha, Adam quqyqtary jónindegi ýákil ınstıtýty Konstıtýtsııada kepildik berilgen adam men azamattyń negizgi quqyqtary men bostandyqtaryn qorǵaýmen tikeleı baılanysty bolǵandyqtan, bul árdaıym ózekti. Adam men azamattyń buzylǵan quqyqtaryn qalpyna keltirý dál osy Adam quqyqtary jónindegi ýákil ınstıtýtynyń quqyqtyq mártebesin, qyzmetiniń qaǵıdattary men kepildikterin zańnamalyq deńgeıde naqty aıqyndaý arqyly onyń odan ári damýyna baılanysty bolady. Sondyqtan bul ınstıtýtty damytýdyń mańyzdylyǵy men qajettiligi daýsyz.
«Qazirgi ýaqytta Zańnama jáne sot-quqyqtyq reforma komıtetinde «Qazaqstan Respýblıkasyndaǵy Adam quqyqtary jónindegi ýákil týraly» zań jobasy qaralyp jatyr. Negizgi zań jobasyn iske asyrý úshin Azamattyq protsestik, Qylmystyq protsestik, Ákimshilik rásimdik-protsestik kodeksterine, Ákimshilik quqyq buzýshylyq týraly kodekske, Bıýdjet jáne Salyq kodeksterine túzetýler ázirlendi. Zań jobalaryna Parlament depýtattary adam men azamattyń quqyqtary men bostandyqtaryn qorǵaý salasyndaǵy zańnamany jetildirý maqsatynda bastama jasady. Olar Adam quqyqtary jónindegi ýákil men onyń óńirdegi ókiliniń mártebesin, olardyń ókilettikterin, laýazymǵa saılaý jáne laýazymnan bosatý tártibin, qyzmetiniń qaǵıdattary men kepildikterin, Adam quqyqtary jónindegi ulttyq ortalyqtyń negizgi fýnktsııalaryn jáne qarjylandyrý kózderin retteıdi», - dedi depýtat.
Zań jobalarynyń maqsaty – adam men azamattyń quqyqtaryn sottan tys qorǵaý kepildikterin oryndaýdyń zańnamalyq negizin qurýǵa umtylý.
«Birikken Ulttar Uıymynyń qaǵıdattary men usynymdaryna sáıkes keletin arnaıy zańnyń qabyldanýy Adam quqyqtary jónindegi ýákilge quqyq qorǵaý rásimderine tolyqqandy qatysýǵa múmkindik beredi. Ulttyq quqyq qorǵaý mekemelerin nyǵaıtýdyń Parıj jáne Venetsııa qaǵıdattarynyń usynymdary negizgi jáne ilespe zań jobalaryn ázirleýge negiz etip alyndy. Naqty ókilettikter men olardy iske asyrý ólshemderin aıqyndaý, zań deńgeıinde kandıdattarǵa qoıylatyn talaptardy, onyń qyzmetiniń negizgi qaǵıdattaryn bekitý Adam quqyqtary jónindegi ýákildiń áleýetin nyǵaıtýǵa múmkindik beredi.
Eń aldymen, bul - adam quqyqtary men bostandyqtarynyń múddesi úshin zańdylyq, obektıvtilik jáne ádildik, ashyqtyq, táýelsizdik, jaýapkershilik.
Budan buryn habarlanǵandaı, osy aptada Májilistiń jalpy otyrysynda «Qazaqstan Respýblıkasyndaǵy Adam quqyqtary jónindegi ýákil týraly» zań jobasy birinshi oqylymda maquldandy.
