Adam quqyqtary jónindegi ýákil: Ólim jazasyn joıý qylmysqa degen kózqarastyń jumsarǵanyn bildirmeıdi

NUR-SULTAN. QazAqparat – QR Adam quqyqtary jónindegi ýákili Eltvıra Ázimova ólim jazasyn joıýdy kózdeıtin zań jobasyn Qazaqstan qoǵamyn dmokrantııalandyrýǵa, eldegi qylmyspen kúres saıasatyn izgilendirýge bastaıtyn qadam retinde baǵalady, dep habarlaıdy QazAqparat tilshisi.

«Ólim jazasyn joıý - Qazaqstannyń qoǵamdy demokratııalandyrýǵa jáne qylmyspen kúres saıasatyn izgilendirýge baǵyttalǵan mańyzdy qadamy. Halyqaralyq qujattarda ólim jazasy jazanyń óte qatal, adamgershilikke jatpaıtyn túri retinde tanylǵan. Bul rette atalǵan jaza sharasyn taǵaıyndaý kezinde sottyń qate lesý táýekeli bar ekenine eskeriledi. Sondaı-aq, joǵary jazany saqtaý qylmystyń tómendeýine áser etpeıtinin dáleldeıtin derekter bar», - deıdi zańger.

Onyń paıymynsha, ólim jazasyn saqtaý nemese joıý máselesi qoǵamda árqashan qaıshylyqty pikirler týyndatady.

«Kóptegen adamdar ólim jazasyn asa aýyr qylmystarǵa eń utymdy jaýap dep sanaıdy. Sonymen qatar, adamdy memleket atynan ómirden aıyrý adam quqyqtaryn qorǵaý máselesi turǵysynan tıimdi bolyp sanalmaıdy.

Ólim jazasyn alyp tastaý qylmysqa taǵaıyndalatyn jazanyń jumsarǵanyn bildirmeıdi. Aýyr qylmys jasaǵan adamdar qatań jazalanýy kerek, olar qatygez áreketterge jol berilmeıtinin jol túsinýi kerek», - dedi Adam quqyqtary jónindegi ýákil.

Eske salsa, búgin Memleket basshysy ólim jazasyn joıý máselesi boıynsha zańǵa qol qoıdy.