Adam quqyqtary jónindegi ýákil men Astanadaǵy Eýroodaq Elshisi birlesken jobalardy ázirleý týraly kelisimge keldi

ASTANA. QazAqparat - Búgin Qazaqstan Respýblıkasyndaǵy Adam quqyqtary jónindegi ýákil (Ombýdsmen) Asqar Shákirov Astanadaǵy Eýropalyq Odaqtyń Elshisi Aýrelııa Býshezben jáne Ortalyq Azııadaǵy Halyqaralyq túrme reformasynyń (PRI) Óńirlik dırektory Sáýle Mektepbaevamen kezdesti.

Júzdesý barysynda áleýmettik saıasattyń jańa qaǵıdattaryn ımplementteý, áleýmettik quqyqtardy jáne memlekettik qyzmet alý salasynda da halyqtyń osal toptarynyń quqyqtaryn qorǵaý bóliginde «Qazaqstan-2050» Strategııasyn iske asyrý kezinde ekijaqty ózara árekettesýdiń perspektıvalary talqylandy.

Taraptar adam quqyqtaryn qorǵaý júıesin jetildirý, Qazaqstanda Ombýdsmen mekemesin ári qaraı ınstıtýtsıonaldy damytý, Elbasynyń tapsyrmasy boıynsha ótkizilip jatqan qylmystyq-quqyqtyq reforma, sondaı-aq qaıta qurylǵan Azaptaýdy aldyn alýdyń ulttyq aldyn alý tetigin (UAT) tájirıbe júzinde iske asyrý máselelerine jan-jaqty toqtaldy.

Qazaqstandyq Ombýdsmen atap ótkendeı, azamattardyń memlekettik qyzmetterge qoljetimdiligine degen quqyqtaryn qamtamasyz etý, halyqtyń osal toptaryn qorǵaý jáne jalpy áleýmettik máseleler ulttyq quqyq qorǵaý mekemesi úshin basty máseleler bolyp tabylady, bul rette basymdylyq aldyn alý sharalaryna beriledi.

«Sondaı-aq jabyq mekemelerdegi azaptaýdyń aldyn alýǵa zor mańyz berilýde. Monıtorıngtik qyzmet sheńberinde memlekettik organdar men azamattyq qoǵam arasyndaǵy yntymaqtastyqtyń, onyń ishinde Azaptaý faktilerin qaraý jónindegi ýákil janyndaǵy Jumys tobynyń aıtarlyqtaı tájirıbesi jınaqtalǵan», - dep atap ótti A. Shákirov.

Óz kezeginde, A. Býshez Qazaqstanda adam quqyqtaryn qorǵaýdyń quqyqtyq quraldaryn damytýǵa kómek kórsetýge qyzyǵýshylyǵyn tanytty.

Kezdesý qorytyndylary boıynsha taraptar quqyq qorǵaý salasyndaǵy yntymaqtastyqty jolǵa qoıý men birlesken jobalardy ázirleý týraly kelisimge keldi.