Adam quqyqtary jónindegi ombýdsmenge qamaý oryndaryna kedergisiz kirý quqyǵy beriledi
Bul týraly QR Ádilet mınıstri Qanat Mýsın «Qazaqstan Respýblıkasyndaǵy Adam quqyqtary jónindegi ýákil týraly» Konstıtýtsııalyq zań jobasynMájilistiń jalpy otyrysynda tanystyrǵan kezde aıtty.
Onyń málimeti boıynsha, atalǵan konstıtýtsııalyq zań jobasy 6 taraýdan jáne 23 baptan turady.
«Ýákildiń, onyń oblystardaǵy ókilderiniń jáne Adam quqyqtary jónindegi ulttyq ortalyqtyń qyzmetin uıymdastyrýǵa baılanysty erejeler kózdelgen. Qoldanystaǵy zańda kózdelmegen negizgi jańa erejelerge tolyǵyraq toqtalǵym keledi. Jańa erejelerdi eki topqa bólýge bolady. Birinshisi – ýákildiń quzyretin kúsheıtý, ekinshisi – onyń qyzmetin uıymdastyrýdyń tıimdiligin arttyrý», - dedi mınıstr.
Onyń sózine qaraǵanda, ýákildiń quzyretin kúsheıtý bóliginde ombýdsmenniń azamattyń Konstıtýtsııada bekitilgen quqyqtary men bostandyqtaryn qozǵaıtyn normatıvtik quqyqtyq aktilerdiń Konstıtýtsııaǵa sáıkestigi máselesi boıynsha Konstıtýtsııalyq Sotqa júginý quqyǵy kózdelgen.
«Ekinshiden, basqa memleketterdiń shaqyrýy boıynsha adam quqyqtary men bostandyqtarynyń saqtalýyna baıqaýshy retinde áreket etý quqyǵyn berý usynylady. Úshinshiden, ýákildiń quzyretin kúsheıtý maqsatynda onyń arnaýly áleýmettik qyzmetter kórsetetin uıymdarǵa jáne qylmystyq-atqarý júıesi mekemelerine kedergisiz barý quqyǵy bekitiledi», - dedi Qanat Mýsın.
