Adam quqyqtary jónindegi komıssııanyń ókilderi Astanadaǵy Balalar úıinde boldy
ASTANA. 28 sáýir. QazAqparat /Arman Asqarov/ - Búgin QR Prezıdenti janyndaǵy Adam quqyqtary jónindegi komıssııanyń ókilderi Astanadaǵy Balalar úıinde bolyp, osy mekemede tárbıelenip jatqan jasóspirimderdiń turmys jaǵdaıymen jan-jaqty tanysyp shyqty.
Komıssııa tóraǵasy Saǵynbek Tursynov atap kórsetkendeı, jyl basynan beri komıssııanyń qaraýyna balalar quqyqtaryn buzý oqıǵalary boıynsha 32 aryz kelip tústi. «Onda tárbıeshilerdiń óz qyzmetin asyra paıdalanyp, shákirtterdi renjitetin jaǵdaılar týraly jıi aıtylady. Osy máseleni tekserip bolǵannan keıin biz «Qazaqstandaǵy adam quqyqtarynyń jaǵdaıy týraly» jyl saıynǵy baıandamamyzdy Elbasy Nursultan Nazarbaevqa usynatyn bolamyz. Bul qujat shamamen mamyrdyń orta sheninde daıyn bolmaq», - dedi S.Tursynov.
Óz sózinde komıssııa tóraǵasy Astanadaǵy Balalar úıinde atqarylyp jatqan jumystarǵa, sondaı-aq osy mekemedegi jasóspirimderge tárbıe berý jáne olardyń densaýlyǵyn saqtaý boıynsha qolǵa alynǵan is-sharalarǵa joǵary baǵa berdi.
