Adam quqyqtary boıynsha Ulttyq is-qımyl josparynyń oryndalýyn barynsha naqtylaý kerek - dóńgelek ústel

ALMATY. 26 maýsym. QazAqparat - Ulttyq jospar is-qımylynyń aıaqtalýy qarsańynda josparlanǵan ár sharanyń oryndalý merzimin jáne oǵan jaýapty ár memlekettik organdy naqtylap alý qajet.

Bul týraly búgin  Almatyda ótken Halyqaralyq azaptaýǵa qarsy kúnine oraı ótkizilgen  dóńgelek ústel jıynynda aıtyldy.

Bul shara 2011 jyldyń 1 naýryzynan bastap júzege asyryp kele jatqan «Adam quqyǵy salasyndaǵy Ulttyq is-qımyl josparynyń Qazaqstanda  oryndalýyna júrgizilgen monıtorıng» jobasynyń aıasynda uıymdastyrylǵan bolatyn. Eýropalyq odaq qarjylandyratyn atalmysh jobany Adam quqyqtary men zańdylyqty saqtaý jónindegi qazaqstandyq halyqaralyq bıýro, Quqyqtyq saıasatty zertteý ortalyǵy (LPRC) jáne MediaNet halyqaralyq jýrnalıstıka ortalyǵy birlesip júzege asyrýda. Sarapshylardyń aıtýynsha, Qazaqstandaǵy   bas bostandyǵynan aırylǵandar quqyǵy men  azaptaýdan azat bolý quqyǵy salasyndaǵy Ulttyq josparda qarastyrylǵan sharalardyń oryndalýynda birizdilik joq.  Adam quqyqtary men zańdylyqty saqtaý jónindegi qazaqstandyq halyqaralyq bıýro Shyǵys Qazaqstan bólimshesiniń dırektory Qýat Rahymberdınniń sózine qaraǵanda, Qazaqstandaǵy túrmede otyrǵandar sany 2000 jylǵy 67 937 adamnan 2010 jyly 50840 adamǵa deıin kemidi. Alaıda osyǵan qaramastan qoǵamnan alastatý túrindegi jaza qylmystyq-quqyqtyq is-qımyl jasaý sharalary júıesinde áli aldyńǵy orynda kele jatyr.