Adam quqyǵy balanyń quqyqtaryn qorǵaýdan bastalady - Artýr Lastaev

ShYMKENT. QazAqparat – Adam quqyqtary jónindegi ýákil Artýr Lastaev Shymkent qalasyndaǵy №6 balalarǵa arnaıy áleýmettik qyzmet kórsetý ortalyǵynda boldy, dep habarlaıdy QazAqparat vedomstvo saıtyna silteme jasap.

Ombýdsmen erekshe balalardyń ortalyqta turý sharttarymen, ońaltý jáne kómek kórsetý fýnktsııalarynyń tıimdiligimen tanysty. Qozǵalysty damytý, densaýlyqty nyǵaıtý, ońaltý jáne emdik dene shynyqtyrý is-sharalarynyń sapasyn kóterý maqsatynda qurylǵan emdeý-dene shynyqtyrý sabaǵyna arnalǵan bólmeni qarap shyqty. Dırektor K. Aýanasova zamanaýı medıtsınalyq qural-jabdyqtar men ońaltý is-sharalarynyń arqasynda búginde múgedektigi bar balalar densaýlyǵynyń jaqsarǵanyn jetkizdi.

Ortalyqta qazirgi ýaqytta 139 bala statsıonarlyq jaǵdaıda, 89 bala jartylaı statsıonarlyq jaǵdaıda túrli qyzmet túrlerin alady. Olarǵa 8 arnaıy áleýmettik-psıhologııalyq qyzmet kórsetiledi.

A. Lastaev múmkindigi shekteýli balalardy qorǵaý máselesi árqashan memlekettiń erekshe baqylaýynda ekenin, olardy qamtamasyz etý úshin barlyq qajetti sharalar qabyldanyp jatqanyn atap ótti. Ol sondaı-aq, mekeme jumysyn baǵalap, múgedek balalarǵa kútim jasaý únemi meıirimdilik pen shydamdylyqty qajet etetinin sóz etti. Balalardyń quqyqtarynyń buzylýyna jol bermeı, kómek qolyn sozý basty nazarda bolýy tıis.

«Adam quqyqtary balanyń quqyqtaryn qorǵaýdan bastalady. Biz bul týraly umytpaýymyz kerek. Búgin olardy qorǵaý arqyly, biz búldirshinderdiń balalyq shaǵyn qaýipsiz, jarqyn ete alamyz», - dedi Ombýdsmen.