Adam quqyqtary jónindegi ýákilge Bas prokýratýrany «qamshylap otyratyn» quzyret berý usynyldy
Májilis depýtaty, zańger Marat Báshimov «Adam quqyqtaryn qamtamasyz etetin halyqaralyq quqyqtyq normalardy ulttyq zańnamaǵa ımplementatsııalaý» atty halyqaralyq ǵylymı-praktıkalyq konferentsııada zańnamaǵa Bas prokýratýrany qamshylap otyratyn norma engizýdi usyndy, dep habarlaıdy Kazinform.
«Qazir Adam quqyqtary jónindegi ınstıtýttardyń TMD memleketterinde, basqa da elderde óziniń ornyn taýyp úlgerdi me degen suraqtar týyndap tur qoǵamda. Óıtkeni kóbinese olardyń jumystary túsken aryzdardy prokýratýraǵa joldaýmen shektelip jatyr. 1988 jyly Polshada qabyldanǵan zańdarda bir norma bolǵan. Prokýratýra adamnyń quqyqtary taptalyp jatqan qandaı da bir faktige kóńil bólmese, reaktsııa bildirmese, Adam quqyqtary jónindegi ýákilge qarsylyq bildirýge quzyret bergen. Búgingi jıyn ǵylymı-praktıkalyq konferentsııa bolǵandyqtan osyny zertteý týraly usynyp turmyn. Bir jaǵynan qaraǵanda, onyń halyqqa qanshalyqty paıdasy bolatynyn túsinip alýymyz kerek», — dedi zańger.
Onyń sózinshe, Adam quqyqtary jónindegi ýákil degen — halyqtyń ınstıtýty.
«Adam quqyqtary jónindegi ýákilge ondaı quzyret berilse, Bas prokýratýrany qamshylap otyratyn tetik paıda bolar edi. Bul norma boıynsha quqyǵy taptaldy dep eseptegen adam Bas prokýratýraǵa resmı túrde júginý kerek. Ol aryz-shaǵymyna Bas prokýratýradan reaktsııa bolmasa, Adam quqyqtary jónindegi ýákilge júginedi. Ýákil sol shaǵym negizinde qarsylyq bildirip, isti qaıta qozǵaý týraly bastama kótere alady. Menińshe, zańǵa osyndaı norma kirgizýge bolady», — dedi Májilis depýtaty.
