Adam quqyqtary jónindegi ýákil Otarda jaǵy synǵan sarbazǵa qatysty pikir bildirdi

ASTANA. KAZINFORM — Adamnyń qadir-qasıetin taptaýǵa eshkimniń quqyǵy joq. Bul týraly Qazaqstan Respýblıkasyndaǵy Adam quqyqtary jónindegi ýákil Artýr Lastaev málimdedi.

Resmı saýalymyzǵa bergen jaýabynda ol Otardaǵy áskerı bólimde bolǵan quqyqbuzýshylyqqa toqtaldy.

— Adamnyń qadir-qasıetine qol suǵýǵa bolmaıdy. Bul QR Konstıtýtsııasynda bekitilgen, sondaı-aq Azamattyq jáne saıası quqyqtar týraly halyqaralyq paktide jazylǵan. Al atalǵan jaǵdaıǵa qatysty aıtar bolsaq, tek sot qana quqyqtyq baǵa bere alady. Biz sotqa deıingi tergeý sapaly ótip, ádil sot sheshimi qabyldanady dep úmittenemiz, — dedi ombýdsmen.

Eske salaıyq, buǵan deıin oqıǵanyń mán jaıyn tolyq jazǵanbyz. Zardap shekken sarbazdyń týystary taratqan aqparatqa saı, ony serjant temirmen uryp, jaǵyn syndyrǵan. Alaıda serjanttyń ózi muny joqqa shyǵaryp, jaraqat alǵan sarbaz ózi sekildi qatardaǵy jaýyngermen tóbeleskenin aıtqan edi. Al QR Qarýly Kúshteri áskerı polıtsııasy bas basqarmasy áskerı qyzmetshige qatysty kúsh qoldaný faktisi boıynsha qylmystyq is qozǵalǵanyn málimdegen bolatyn.

Sonymen qatar, buǵan deıin Otardaǵy áskerı bólimde jaǵy synǵan sarbazdyń jaǵdaıy týraly jazǵanbyz.