Adam kóp jınalatyn nysan ıeleri órtten saqtandyrý rásimdeı alady
ASTANA. KAZINFORM – Qazaqstanda adam kóp jınalatyn nysandar ıeleriniń órtke qatysty jaýapkershiligin saqtandyrý engizilýi múmkin. Bul týraly QR Qarjy naryǵyn retteý jáne damytý agenttigi tóraǵasynyń orynbasary Marııa Hadjıeva aıtyp berdi.
«Tótenshe jaǵdaılar mınıstrligimen birlesip, órtten adamdar kóp jınalatyn obektiler ıeleriniń jaýapkershiligin saqtandyrýdy engizý boıynsha zańnamalyq túzetýler ázirlenip jatyr. Mundaı saqtandyrý saýda ortalyqtary men aýdany 2 000 sharshy metrden asatyn adamdar kóp jınalatyn iri obektilerde órtten zardap shekken adamdarǵa ótemaqy jasalýyn qamtamasyz etedi. Zań jobasy QR Parlamenti Májilisiniń qaraýynda», - dedi QNRDA ókili Ortalyq kommýnıkatsııalar qyzmetinde ótken baspasóz konferentsııasynda.
Oǵan qosa, spıkerdiń aıtýynsha, Úkimette erikti múliktik saqtandyrýdy yntalandyrý jónindegi usynystar qaralýda jáne tabıǵı apattarǵa beıim óńirlerde azamattardyń jyljymaıtyn múlkin apattar táýekelinen qorǵaý boıynsha sharalar kesheni ázirlenip jatyr.
Aıta keteıik, keıingi 5 jylda saqtandyrý tólemderi 102 mlrd teńgeden 176 mlrd teńgege deıin 70%-ǵa ulǵaıdy. Ásirese mindetti avtosaqtandyrý, múlikti erikti saqtandyrý jáne aýyrǵan jaǵdaıda erikti saqtandyrý kóshbasshy atandy.