Adam kóp, sýy laı, jaǵymsyz ıis bar: Petropavldaǵy jalǵyz jaǵajaı turǵyndardyń kóńilinen shyqpaıdy
PETROPAVL. KAZINFORM — Petropavldaǵy resmı bekitilgen jalǵyz shomylý ornyna qatysty sońǵy kezde turǵyndardyń narazylyǵy kúsheıip keledi.
Pestroe kóliniń jaǵajaıy bıyl kúrdeli jańǵyrtýdan ótip, jazǵy shomylý maýsymynda paıdalanýǵa berilgen edi. Demalýshylar úshin jańa shezlongtar men oryndyqtar ornatylyp, dýsh kabınalary, dárethana, velosıped joldary jáne balalar oıyn alańdary salyndy.
Jańartylǵan aýmaq «eko-saıabaq» retinde tanystyryldy.
Bastapqyda kól mańaıynyń tazaryp, abattandyrylǵanyna qýanǵan jurttyń bir bóligi búginde jaǵajaıdyń jaı-kúıine kóńili tolmaıtynyn aıtyp otyr. Atap aıtqanda, aptap ystyqta kóleńkeli oryn jáne dárethanalar jetispeıdi.
Degenmen kópshilikti alańdatatyn basty másele — kóldiń sýy. Demalýshylardyń aıtýynsha, kól sýy bylyq, túbin qara laı basqan. Keıbiri sýdan batpaqtyń ıisi shyǵatynyn jáne shomylǵannan keıin teriniń qyshýy sııaqty qolaısyzdyqtar týdyratynyn aıtady. Osyǵan baılanysty áleýmettik jelide sý sapasyna qatysty túrli pikirler men alańdaýshylyqtar jıilegen.
Shomylýǵa kelgenderdiń jaraqat alǵan jaǵdaılary da tirkelgen. Oqıǵadan keıin kóldi jalǵa alýshy sý aıdynynyń túbin tastar men temir-tersekten tazartty.
Alaıda bul máseleni túbegeıli sheshpedi. Sýy laı, jaǵymsyz ıis bar.
Petropavl turǵyndary Pestroe kóline shomylýǵa amalsyzdan barady, óıtkeni tańdaý joq. 2024 jylǵy sý tasqynynan keıin Esil ózenindegi qalalyq jaǵajaı jabylyp, Pestroe kóli Petropavl aýmaǵyndaǵy shomylýǵa ruqsat etilgen jalǵyz resmı oryn bolyp qaldy.
Ásirese demalys kúnderi munda «ıne shanshar jer» joq.
Jergilikti bılik buǵan deıin jaǵajaıdy jalǵa alýshy kásipkerge sý aıdynyn tazartý jóninde tapsyrma bergen.
— SQO Sanıtarııalyq-epıdemıologııalyq baqylaý departamenti sý sapasyna turaqty negizde monıtorıng júrgizip otyr. Ýákiletti organdar tarapynan shomylýǵa qatysty qandaı da bir shekteý nemese tyıym engizilgen joq.
Buǵan deıin shomylý maýsymynyń aldynda jaǵajaıǵa irgeles kól túbi mehanıkalyq tásilmen tazartylǵan bolatyn. Sý aıdynynyń ıesimen birlesip, taǵy da kól jaǵalaýy men akvatorııasyn arnaıy tehnıkany tarta otyryp qosymsha tazartý máselesi pysyqtalý ústinde.
Al ekinshi jaǵajaıdy ashý máselesi ázirge qarastyrylyp jatqan joq. Sý tasqynynan keıin Esil ózeniniń arnasy shamamen 6 metrge deıin tereńdep ketken. Osyǵan baılanysty burynǵy jaǵajaıdy qaıta paıdalanýǵa berý qaýipti, — deıdi Petropavl qalasy ákiminiń baspasóz hatshysy Tımýr Jumanov.
Buǵan deıin Atyraýda shomylý maýsymyn ashý merzimi taǵy da keıinge qaldyrylǵanyn jazǵan edik.
