Adam qolynan zardap shegetin janýarlardyń sany azaıa túsedi degen oıdamyn – sarapshy

NUR-SULTAN. QazAqparat – Kúni keshe elimizde janýarlardy qorǵaý, olarǵa jaýapkershilikpen qaraý týraly zań qabyldandy. Jalpy sońǵy ýaqytta janýarlarǵa qamqor bolý máselesi qoǵamda jıi talqylanyp júr. Osy oraıda atalǵan jaıtqa qatysty QazAqparat tilshisi «Ohotzooprom» keńselik jobasynyń jetekshisi Erkin Súleımenovtiń pikirin bilgen edi.

«Aldymen elimizde janýarlar taǵdyrynyń zańmen qorǵalatyny qýantady. Endigi ýaqytta adam qolynan zardap shegetin janýarlardyń sany azaıa túsedi degen oıdamyn. Sol sııaqty jańa zańnamanyń arqasynda qańǵybas janýarlardyń da máselesi sheshimin tappaq. ıAǵnı olarǵa vaktsına salyp, sterıldeıdi. Demek qańǵybas úı janýalarynan keletin qaýip azaıady. Taǵy bir jańashyldyq, 2023 jyldan bastap elimizde úı janýarlaryn tirkeý qolǵa alynbaq. Úı janýary tirkeýde turǵannan keıin, onyń ıesiniń jaýapkershiligin arttyra túspek», - dedi Erkin Súleımenov.

Onyń aıtýynsha, janýarlardy qorǵaýdaǵy basty qadamnyń biri Qazaqstanda jyljymaly haıýanattar baǵy men delfınarıı qyzmetine tyıym salynatyndyǵy.

«Jalpy alǵanda zań jobasyn qoldaımyn. Onyń ústine men jumys tobynyń múshesi boldym. Endi qańǵybas ıt-mysyqtardy jappaı aýlap, olardy sterıldep, vaktsına salý mindeti tur. Bul qańǵybas janýarlar problemasyn sheshýdiń bir joly. Qoǵamda keńinen talqyǵa túsip jatqan taǵy bir jaıt, janýarlarǵa qorlyq kórsetý sátiniń vıdeosyna qatysty. Keıbiri ondaı vıdeony jelige salmaı qajet, jaýyzdyqty nasıhattaıdy dese, ekinshisi kerisinshe qoǵamǵa problemany ashyp kórsetý kerek degen pikirde. Osy oraıda óz oıym, vıdeodaǵy jaýyzdyqty sátti boıap, kishkene jasyrǵan jón», - deıdi ol.

Aıta ketsek, keshe Memleket basshysy «Janýarlarǵa jaýapkershilikpen qaraý týraly» Qazaqstan Respýblıkasynyń Zańyna qol qoıdy.