Adam qaıtys bolǵan jaǵdaıda onyń zeınetaqy jınaǵy kimge qalady

Jerleýge qansha aqsha beriledi?

Qaıtys bolǵan adamnyń Biryńǵaı jınaqtaýshy zeınetaqy qorynda (BJZQ) jınaǵy bolsa, onyń otbasy músheleri jerleýge arnalǵan birjolǵy tólem ala alady.

2026 jyly bul tólemniń eń joǵary mólsheri – 406 550 teńge nemese 94 aılyq eseptik kórsetkish (AEK). Bıyl bir AEK 4 325 teńgeni quraıdy.

Biraq bul aqsha qaıtys bolǵan adamnyń óz jınaǵynan tólenedi. Sondyqtan tólem onyń shotyndaǵy qarajattan aspaıdy.

Mysaly, shotta 300 myń teńge bolsa, otbasy jerleýge osy somadan artyq ala almaıdy. Al jınaǵy 406 550 teńgeden kóp bolsa, aldymen belgilengen mólsherde tólem beriledi.

Zań boıynsha shotta qalǵan aqshany da alýǵa bolady. Eger jerleý tóleminen keıingi qaldyq eń tómengi zeınetaqy mólsherinen aspasa, ol da otbasy múshelerine beriledi. 2026 jyly eń tómengi zeınetaqy – 69 049 teńge.

Máselen, qaıtys bolǵan adamnyń shotynda 450 myń teńge bar delik. Onyń 406 550 teńgesi jerleýge tólenedi. Qalǵan 43 450 teńgeni de otbasy ala alady. Óıtkeni bul soma eń tómengi zeınetaqy mólsherinen az.

Jerleýge arnalǵan tólemdi qalaı alýǵa bolady?

Tólem alý úshin BJZQ bólimshesine barýǵa nemese qordyń saıty arqyly onlaın ótinish berýge bolady.

Bólimshege barǵan kezde jeke kýálik pen bank shotynyń derektemeleri qajet.

Eger memlekettik derekter bazasynda adamnyń qaıtys bolǵany nemese týystyq baılanysy týraly málimet bolmasa, qaıtys bolý týraly kýálik pen týystyqty rastaıtyn qujat qosymsha suralady.

Onlaın ótinish berý úshin elektrondyq tsıfrlyq qoltańba (ETsQ) qajet. Sondaı-aq adamnyń qaıtys bolǵany men týystyq baılanysy týraly málimetter memlekettik derekter bazasynda bolýy tıis.

Eger tólem 14 jasqa tolmaǵan balaǵa tıesili bolsa, onyń atynan zańdy ókili ótinish beredi. Al 14 pen 18 jas aralyǵyndaǵy jasóspirimder ata-anasynyń nemese basqa zańdy ókiliniń jazbasha kelisimimen ózderi ótinish bere alady.

Bul jaǵdaıda balanyń qujattary men óz atyna ashylǵan bank shotynyń derektemeleri qajet.

Qalǵan zeınetaqy jınaǵy kimge beriledi?

Jerleýge arnalǵan tólemnen keıin shotta aqsha qalsa, ol zań boıynsha muragerlerine beriledi.

Muragerler mindetti, mindetti kásiptik jáne erikti zeınetaqy jarnalary esebinen jınalǵan qarajatty ala alady.

Ol úshin BJZQ-ǵa jeke kýálik, muraǵa quqyq týraly kýálik nemese qarajatqa quqyǵyn rastaıtyn zańda kózdelgen basqa qujat jáne bank shotynyń derektemeleri qajet.

Eger memlekettik derekter bazasynda adamnyń qaıtys bolǵany týraly málimet bolmasa, qaıtys bolý týraly kýálik te suralady.

Murager qujattardy qor bólimshesine ózi tapsyra alady. Sondaı-aq senimhat arqyly ókilin jiberýge nemese poshta arqyly joldaýǵa bolady. Sońǵy eki jaǵdaıda qosymsha, onyń ishinde notarıýs kýálandyrǵan qujattar qajet bolýy múmkin.

Mańyzdysy – muraǵa qalǵan aqsha tek muragerdiń óz bank shotyna aýdarylady. Ony týysynyń, qamqorshysynyń nemese senim bildirilgen adamnyń shotyna aýdarýǵa bolmaıdy.

Qajetti qujattar men tólemdi rásimdeý tártibi týraly tolyq aqparat BJZQ-nyń resmı saıtynda berilgen.

Balalar zeınetaqy jınaǵyn muraǵa ala ala ma?

Iá, kámeletke tolmaǵan balalar da zeınetaqy jınaǵyn muraǵa ala alady.

14 jasqa tolmaǵan balanyń atynan qujattardy ata-anasy, asyrap alýshysy nemese qamqorshysy tapsyrady.

Al 14 pen 18 jas aralyǵyndaǵy jasóspirimder zańdy ókiliniń kelisimimen ózderi ótinish bere alady.

Murany rásimdeý úshin balanyń týý týraly kýáligi, muraǵa quqyqty rastaıtyn qujat jáne bank shotynyń derektemeleri qajet.

Jasyna jáne jaǵdaıyna qaraı balanyń jeke kýáligi, ata-anasynyń jazbasha kelisimi nemese qamqorshylyqty rastaıtyn qujattar da suralýy múmkin.

Muraǵa qalǵan aqsha ata-anasynyń emes, balanyń óz atyna ashylǵan bank shotyna túsedi.

Muraǵa qalǵan aqshadan salyq ustala ma?

2026 jylǵy 1 qańtardan bastap Qazaqstan rezıdentterine BJZQ-dan beriletin zeınetaqy tólemderinen jeke tabys salyǵy ustalmaıdy.

Al Qazaqstannyń rezıdenti emes adamdarǵa tólenetin qarajatqa Salyq kodeksine sáıkes salyq salynady.

Buǵan deıin Qazaqstanda zeınetaqy annýıteti boıynsha tólemder 81,5 mlrd teńgege jetkeni týraly jazdyq.