Adam kapıtalyn jahandyq baǵalaý: Qazaqstan 160-tan asa eldiń arasynda 42-orynǵa taban tiredi

– Dúnıejúzilik banktiń málimetine sáıkes, byltyr tabysy tómen jáne ortasha elderde turatyn 1,6 mıllıard adam áleýmettik qoldaý sharalaryna qol jetkize almaǵan. Tsıfrlyq kedergiler de áleýmettik teńsizdikti kúsheıte tústi. Elimizde áleýmettik jeliler men zańdy onlaın-qyzmet túrleriniń bári eshqandaı shekteýsiz jumys istep tur. Bul – memlekettik saıasattyń ashyqtyǵyn jáne qoǵamda pikir alýandyǵy bar ekenin ańǵartady. Budan bólek, Qazaqstan elektrondy úkimet júıesi jáne qarjylyq tehnologııany damytý boıynsha eń ilgeri elderdiń biri sanalady. Biraq biz munymen toqtap qalmaımyz. Tsıfrlandyrýdy jáne jasandy ıntellektini jappaı engizýdi jalǵastyra beremiz. Bul mindetti strategııalyq maǵynaǵa ıe másele retinde qabyldaýymyz kerek. Óıtkeni bul – zaman talaby, sondaı-aq, ósip-órkendeýge, memlekettiń tıimdiligin arttyrýǵa jol ashatyn asa mańyzdy qadam. Bir sózben, álemdegi kúrdeli geosaıası ahýal men el ishindegi ózekti túıtkilderge qaramastan, Qazaqstan damýdyń dańǵyl jolyna túsip, nyq senimmen alǵa qadam basyp keledi, - dedi Memleket basshysy.

Jalpy, 2025 jyldyń qorytyndysy boıynsha Qazaqstan adam kapıtalyn jahandyq baǵalaýdaǵy pozıtsııasyn aıtarlyqtaı nyǵaıtyp, 160-tan asa eldiń arasynda 42-orynǵa taban tiredi. Bul kezdeısoq emes. Sońǵy jyldardaǵy aýqymdy memlekettik ınvestıtsııalar qazirdiń ózinde jemis berip, strategııalyq tıimdiligin kórsete bastady. Atalǵan bedeldi ındekste Qazaqstannyń joǵary kóterilýi memlekettik saıasattyń uzaqmerzimdi qısynǵa ári naqty basymdyqtarǵa súıenetinin kórsetedi.

Bul degenimiz – ult saýlyǵyn nyǵaıtý, bilim sapasyn arttyrý, balalar men jastarǵa arnalǵan múmkindikterdi keńeıtý, ǵylymdy, mádenıetti, sportty qoldaý, ozyq ınnovatsııaǵa, tsıfrlandyrýǵa den qoıý, jasandy ıntellektini engizý, jaıly áleýmettik jáne kásipkerlik orta qurý.

– Memleket osy jáne basqa da salalardy dáıekti túrde damytyp keledi. Sol arqyly azamattardyń áleýetin órkendetýge jol ashady. Bul – bizdiń túpkilikti tańdaýymyz. Sebebi jańa zamanda halqynyń keleshegin kemel etýge umtylǵan memleketter ǵana utady. Jıyndarda, Úkimet otyrystarynda, eńbek ujymdarymen kezdesýlerde bos maqtannan, toqmeıilsýden aýlaq bolyp, túıtkildi máselelerdi ashyq aıtyp, onyń sheshimin birlesip izdeýimiz qajet ekenin, aldymyzǵa bıik maqsat qoıý keregin únemi aıtyp kelemin. Sonda ǵana naqty tabysqa jete alatynymyzǵa senimdimin, - dedi Prezıdent.

Aıta keteıik, «Ulttyq qor – balalarǵa» jobasy aıasynda 7 mln-ǵa jýyq balanyń esepshotyna 2,5 mlrd dollar aýdaryldy.