Adam qandaı jaǵdaıda toq ishektiń qaterli isigine shaldyǵady
ALMATY. KAZINFORM – Toq ishektiń qaterli isigi toq ishek pen tik ishekke áser etetin jáne erler men áıelderde jıi kezdesetin aýrý túri. Bul týraly Almaty onkologııalyq ortalyǵynyń endoskopııa bóliminiń meńgerýshisi Marat Esenbolatov aıtty.
«Toq ishek qaterli isiginiń belgileri ár túrli bolýy múmkin, olar ishek tranzıtiniń ózgerýi, nájistegi qan, ishtiń aýyrýy, sharshaý, sebepsiz salmaq joǵaltý. Bastapqy kezeńde aýrý esh belgisiz ótýi múmkin, bul aýrýdy odan ári qaýipti etedi», — dedi dáriger.
Onyń aıtýynsha, toq ishek qaterli isigi damýynyń negizgi qaýip faktorlary — tuqym qýalaý, durys tamaqtanbaý, fızıkalyq belsendiliktiń joqtyǵy, semizdik, temeki shegý jáne alkogoldi shamadan tys paıdalaný.
Sol sebepti salaýatty ómir saltyn ustanǵan jón.
Sondaı-aq, belgili bir jastan bastap nemese qaýip faktory oryn alǵan kezde júıeli túrde skrınıngtik tekserýden ótý mańyzdy.
Aýrýmen kúresýdiń negizgi ádisi — isikti hırýrgııalyq alyp tastaý, hımıoterapııa jáne sáýlelik terapııa.
«Toq ishek qaterli isigin der kezinde dıagnostıkalaý jáne emdeý naýqastyń ómirin saqtaýǵa, uzaq jyldar belsendi ómir súrýine múmkindik beredi. Sondyqtan densaýlyqty durys kútip, qadaǵalap, kúdikti belgi paıda bolǵan kezde dárigerge der kezinde qaralý kerek», — deıdi Marat Esenbolatov.
Almatyda onkologııalyq kómekti 76 alǵashqy medıtsınalyq-sanıtarlyq kómek uıymy kórsetedi.
«2023 jyldyń qorytyndysy boıynsha qalada skrınıngtik tekserý josparynyń oryndalýy — 99,6%. Toq ishek obyryna 89 923 naýqas skrınıngtik tekserýden ótti. Skrınıng nátıjesinde toq ishek qaterli isiginiń 46 jaǵdaıy anyqtaldy», — dedi onkolog dáriger Marat Esenbolatov.
