Adam qaǵyp, oqıǵa ornynan boı tasalaǵan júrgizýshi ustaldy - Almaty oblysy
TALDYQORǴAN. QazAqparat - Almaty oblysynyń polıtsııasy adam qaǵyp, oqıǵa ornynan boı tasalaǵan kólik júrgizýshisin anyqtady. Atalǵan jol-kólik oqıǵasy saldarynan jaraqat alǵan adam qaza bolǵan edi, dep habarlaıdy QazAqparat tilshisi.
Oblystyq ІІD baspasóz qyzmetiniń málimetine qaraǵanda, jol-kólik oqıǵasy 14 sáýirde «Almaty-Bishkek» tas jolynda boldy. Kólik soqqysynan 32 jastaǵy Ózbekstan azamaty qaza bolǵan edi. Oqıǵa ornynan jaltarǵan avtokólik pen onyń júrgizýshisin anyqtaýǵa patrýldik qyzmet pen oblystyq jedel izdestirý bólimi jumyldy.
«Oqıǵa ornynan avtokólik boıaýy, bamperi men shamynyń synyqtary tabylyp, onyń «Mercedes-Benz Viano» kóligine sáıkestigi anyqtaldy. Budan soń, jedel izdestirý sharasy barysynda Jambyl aýdanyndaǵy kóliktiń ıesi de anyqtaldy. Kúdiktiniń turǵylyqty jerin teksergende dál sondaı synyqtary bar avtokólik tabyldy, soǵan oraı júrgizýshi sol arada ustalyp, polıtsııaǵa jetkizildi», - dedi Almaty oblysy ІІD Jergilikti polıtsııa qyzmeti Іzdestirý bóliminiń bastyǵy, polıtsııa podpolkovnıgi Erlan Káribaev.
Onyń aıtýynsha, qazirgi tańda atalǵan fakti boıynsha sotqa deıingi tergeý bastalyp, tıisti saraptamalar berilgen. Ustalǵan kúdiktiniń kóligi arnaıy turaqqa qoıyldy.
Aıta keterligi, jyl basynan beri óńirde jaıaý júrginshilerdi qaǵyp óltirip, oqıǵa ornynan boı tasalaǵan 8 fakti tirkelgen. Onyń 7-eýine qatysty polıtsııa kúdiktilerdi anyqtap, olardy zań aldynda jaýapqa tartqan.
