Adam Farýh pen Aleksandr Vınokýrov bastaǵan 7 adam «Qazaqstannyń Іzgi nıet elshisi» atandy
ASTANA. KAZINFORM – Syrtqy ister mınıstrliginde «Qazaqstannyń Іzgi nıet elshileri» jobasynyń tusaý kesilip, 7 adamǵa resmı tósbelgi men tıisti dıplom tabystaldy.
Aıta ketý kerek, atalmysh joba Prezıdent Qasym-Jomart Toqaevtyń bastamasymen qolǵa alynǵan.
Іs-sharada sóz alǵan Premer-Mınıstrdiń orynbasary – Syrtqy ister mınıstri Murat Nurtileý jańa jobanyń maqsatyna toqtaldy.
«Álemniń 75 elinde 114 sheteldik mekememiz bar. Ótken jyly biz shet elde 3 jańa mekeme ashtyq. Bıylǵy jyly qosymsha 2 elshilik, 1 turaqty ókildik jáne 4 bas konsýldyq jumysyn bastady. Jyldyń sońyna deıin taǵy 5 mekeme ashýdy josparlap otyrmyz. Qazaqstanda shet elderdiń 71 elshiligi men 25 konsýldyq mekemeleri jáne 33 halyqaralyq uıymnyń ókildikteri akkredıtatsııa alǵan. Qazaq eliniń jeti birdeı kórnekti ókilin Іzgi nıet elshisi retinde taǵaıyndaý da osy baǵyttaǵy Memleket basshysynyń birizdi ári tórt shuǵylasy teń syrtqy saıasatyna úlken qoldaý dep bilemiz. Kópultty halqymyzdyń kelisim men dıalogqa degen dástúrli yqylasyna saı genetıkalyq kody syrtqy álemmen mazmundy jáne ózara tıimdi qarym-qatynastardyń kepili. Biz muny shetelde nasıhattaýymyz abzal», - dedi mınıstr.
Resmı túrde «Qazaqstannyń Іzgi nıet elshileri» qurmetti ataǵyn alǵash bolyp ıelengen 7 adamnyń tizimi mynandaı:
Álemge áıgili mýzykant, Mission Aral ekologııalyq jobasynyń avtory Marat Beısenǵalıev;
2012 jylǵy Olımpıada oıyndarynyń jeńimpazy, «Astana» velokomandasynyń bas menedjeri Aleksandr Vınokýrov;
Halyqaralyq antııadrolyq qozǵalystyń belsendisi, sýretshi Káripbek Kúıikov;
TikTok áleýmettik jelisi arqyly «Júrek» týyndysymen álemge Adam atymen tanylǵan ánshi Mırfarýh Mırhıdaı;
«Qazaqstannyń úzilissiz memlekettiligi tarıh tolqynynda. XVІ-XIX ǵasyrlardaǵy eýropalyq jáne amerıkalyq kartalardaǵy Qazaq memleketi» kitabynyń avtory Muhıt-Ardager Sydyqnazarov;
N.Tilendıev atyndaǵy «Otyrar» sazy memlekettik akademııalyq orkestiriniń bas dırıjeri Dınara Tilendıeva;
«Aýyldaǵy sport» qozǵalysynyń negizin qalaýshy Sergeı Tsırýlnıkov;
Tanymal kardıohırýrg ıÝrıı Pıa.
SІM jobasy BUU Damý baǵdarlamasynyń, UNESCO, UNICEF uıymdarynyń tájirıbesi negizinde sheteldik aýdıtorııa nazaryn Qazaqstanǵa aýdarýdy, «jumsaq kúsh» arqyly memlekettiń abyroıyn nyǵaıtýdy kózdeıdi.
Іzgi nıet elshisi atanýǵa úmitkerler Qazaqstan azamattyǵynyń bolýy, óz isiniń naǵyz mamany retinde halyqaralyq deńgeıde tanymal bolýy, kirshiksiz moraldyq kelbeti, «Іzgilik elshisi» mıssııasyn oryndaý jónindegi tól baǵdarlamasynyń bolý sııaqty ólshemsharttar negizinde irikteledi.
