Adam densaýlyǵyna qaýipti jalǵan dárilik zat óndirgen tórt farmatsevtıkalyq kompanııa anyqtaldy
ASTANA.KAZINFORM - Іshki ister mınıstrligi men Ulttyq qaýipsizdik komıteti Almaty qalasynda kórshiles memleketterden dárilik preparattardy, onyń ishinde kúshti áser etetin medıkamentterdi kontrabandalyq jolmen ákelip, keıin olardy elimizdiń dárihanalar jelisi arqyly ótkizýmen aınalysqan tórt farmatsevtıkalyq kompanııanyń zańsyz qyzmetin toqtatty, – dep jazdy Polisia.kz.
Tergeý barysynda kúdiktilerdiń dárilik zattardy, sonyń ishinde quramynda psıhotroptyq zattary bar preparattardy qoldan jasalǵan tásilmen zańsyz óndirgeni anyqtaldy. Birneshe qoıma men jasyryn óndiristik tseh tabyldy. Kontrafaktilik ónimder antısanıtarııalyq jaǵdaıda daıyndalǵandyqtan, azamattardyń ómiri men densaýlyǵyna naqty qaýip tóndirgen. Mundaı preparattardy qoldaný adam densaýlyǵyna qaıtymsyz zardaptarǵa ákelýi múmkin.
Jedel is-sharalar aıasynda atalǵan zańsyz qyzmetti uıymdastyrýshylarǵa aqshalaı syıaqy úshin qoldaý kórsetken laýazymdy tulǵalar anyqtalyp, ustaldy. Olardyń áreketteri Qazaqstan Respýblıkasy Qylmystyq kodeksiniń 366-baby boıynsha saralandy.
Taýar aınalymy men qarjylyq aǵyndarǵa júrgizilgen taldaý kóleńkeli shemalardyń, kontrabandalyq jáne kontrafaktilik qyzmettiń bolǵanyn rastady.
Aldyn ala málimet boıynsha, ótken jyly memleketke 800 mıllıon teńgeden astam soma kóleminde salyqtar men ózge de mindetti tólemder tólenbegen. Birlesken arnaıy operatsııa barysynda zańsyz aınalymnan iri kólemdegi aqsha, ondaǵan myń qaptama jalǵan dárilik preparattar, onyń ishinde aınalymy shektelgen dáriler, sondaı-aq olardy óndirýge arnalǵan jabdyqtar men shıkizat tárkilendi.
Bul jalǵan medıtsınalyq ónimderdiń edáýir kóleminiń zańdy aınalymǵa túsýine jol bermeýge múmkindik berdi. Qylmystyq shemany uıymdastyrýshylar men olardyń sybaılastary ýaqytsha ustaý ızolıatoryna qamaldy.
Sotqa deıingi tergep-tekserý jalǵasyp jatyr. Zańsyz qyzmetke qatysy bar barlyq tulǵa, sondaı-aq dárilik zattardy jetkizý arnalarynyń, onyń ishinde shetelden jetkizý joldarynyń barlyǵyn anyqtaý boıynsha is-sharalar júrgizilip jatyr.
Elde dárilik zattardy tirkeý rásimderin jetildirý jumystary jalǵasyp jatqanyn jazǵan edik.
