Adam balasy úshin densaýlyqtan asqan baılyq joq - kókshetaýlyq meıirbıke

KÓKShETAÝ. QazAqparat – «Jaqsynyń jaqsylyǵyn aıt, nury tasysyn» degen qazaq. Bizdiń búgingi keıipkerimiz Maıra Toqtarbekqyzy Kókshetaý qalalyq kópbeıindi aýrýhanasynyń júıke-júıesi bólimshesinde aǵa meıirbıke bolyp qyzmet atqarady. Medıtsına qyzmetkerleri kúnine oraı, QazAqparat tilshisi osy bir aıaýly janmen jaqynyraq tanysyp, sózge tartqan edi.

Bir áýlettiń bereke-birliginiń uıytqysy, bir ujymnyń úlgi tutar qadirlisi bolyp otyrǵan aq halatty abzal jan Maıra Toqtarbekqyzynyń densaýlyq saqtaý salasynda eńbek etip jatqanyna bıyl 30 jyl tolyp otyr.

1986 jyly Makýshın medıtsınalyq ýchılışesin «Meıirbıke isi» mamandyǵy boıynsha támámdaǵan kezde ol nebary 18 jastaǵy uıań qyz edi. Oqýyn bitirgen soń eńbek jolyn Shoq-Qaraǵaı aýylynyń felsherlik akýsherlik pýnktinde meńgerýshi retinde bastady. Sodan beri ol bar ǵumyryn halyqtyń saýlyǵy úshin aıanbaı eńbek etýge arnap keledi. 1990 jyldan bastap osy ýaqytqa deıin Kókshetaý qalalyq kópbeıindi aýrýhanasynyń júıke-júıesi bólimshesiniń meıirbıkesi, al 2017 jyldan bastap osy bólimsheniń aǵa meıirbıkesi bolyp eńbek etedi.

Júzinen meıirim, ár sózinen parasat-paıym seziletin maman óz ortasyna syıly, abyroı bıiginen kórinip júrgen jan. Kezinde oqý ornyn bitirgen soń, bilimin tájirıbemen ushtastyryp, qıyndyǵy men jaýapkershiligi zor qyzmetinde alǵysqa bólene bildi. Jaqsy meıirbıke bolý úshin uqyptylyq, jaýapkershilik degen qasıetter azdyq etedi. Ol úshin kúndelikti tájirıbe kerek deıdi ózi.

«Adam balasy úshin densaýlyqtan asqan baılyq joq. Aýrý azabyn tartyp, dárigerdiń kómegine júgingen naýqasqa qaraılasý, qoldan kelgen medıtsınalyq kómek kórsetý - meniń kásibı mindetim ári adamı paryzym. Solardyń alǵysyn alsam, men úshin odan artyq ataq joq», - deıdi ol.

Keıipkerimiz dári-dármek qana emes, sondaı-aq ár jan úshin jyly sózdiń ózi úlken em ekenin aıtady. Sol sebepti, jan-jaǵyndaǵylarǵa meıirimniń shýaǵyn shashyp júretin Maıra Toqtarbekqyzy óziniń kúsh-jigerine, bilimine senip, ár naýqastyń syrqaty jazylýyn tilep, barynsha kómektesýge tyrysady.

Sonymen birge, ol joǵary sanatty meıirbıke atanyp, ujymda syıly jan bola bildi. Al, qazir aýrýhanaǵa oqýyn endi aıaqtaǵan jas mamandar kelip jatyr. Sol jastardy kórip, keshegi óziniń 18 jastaǵy kezin elestetip, olarǵa analyq aqylyn aıtýdy paryz sanaıdy.

Aıta ketsek, búgingi tańda Aqmola oblysynda 500-den astam medıtsınalyq uıym bar. Óńirde barlyǵy 6 myńnan astam meıirbıke jumys isteıdi.

Eske sala keteıik, budan buryn Máskeýde oqıtyn qazaqstandyq polıtseı kishkentaı balany apattan qutqaryp qalǵanyn jazǵan bolatynbyz.