Adam aıaǵy baspaǵan biregeı aımaqtardy qorǵaý kerek – Almaty ákimi
ALMATY. QazAqparat – Almaty ákimi Baqytjan Saǵyntaev Medeý aýdanynyń aýmaǵyn damytýǵa yńǵaıly bolatyn ýchaskelerdi aralady, dep habarlaıdy QazAqparat.
Ákim Instagram-daǵy paraqshasynda, «Gornyı gıgant» yqshamaýdanynda jeke ınvestordyń qarajatyna mýzykalyq keshen salynatynyn jetkizdi.
«Bolashaqta munda jańa qoǵamdyq jáne áleýmettik nysandar paıda bolady. Jańa kelbetke ıe bolatyn yqshamaýdan qalanyń ortalyǵy sııaqty turǵyndarǵa jaıly meken bolary sózsiz», dep jazdy Baqytjan Saǵyntaev. Sonymen qatar, ol jańa men eski Almatynyń arasyndaǵy tepe-teńdikti saqtaý mańyzdy ekendigine toqtaldy. Ákimniń aıtýynsha, qalada ásirese, áli adam aıaǵy baspaǵan biregeı aımaqtardy qorǵaý kerek. «Máselen, Gornyı gıganttaǵy emen alleıasyn aıtýǵa bolady. Budan ózge turǵyndardyń shaǵymdary boıynsha retke keltirý men abattandyrýdy qajet etetin ýchaskelerdi de araladym. Aýdan ákimi Sultanbek Mákejanovqa Esentaı ózeniniń jaǵalaýyna jaıaý júrginshiler jolyn salý máselesin sheshýdi tapsyrdym», dep jazdy ákim.
