Adam atyp óltirip 18 jylǵa sottaldy - Qyzylorda
QYZYLORDA. QazAqparat-Qyzylorda oblysynyń qylmystyq ister jónindegi mamandandyrylǵan aýdanaralyq soty adam óltirgen jáne zańsyz qarý alyp júrgen sottalýshyny 18 jylǵa bas bostandyǵynan aıyrdy. Ol jazasyn qatań rejımdegi túzeý kolonııasynda óteıdi. Bul týraly Qyzylorda oblysynyń qylmystyq ister jónindegi mamandandyrylǵan aýdanaralyq sotynyń tóraǵasy Saǵatbek Súleımen aıtyp berdi.
Sottalýshy I. byltyr tamyz aıynda áıeli jáne dostarymen birge týǵan kúnde otyrǵan. Túnde «jumysqa barýym kerek» dep shyǵyp ketedi. Qalǵandary otyrysty ári qaraı jalǵastyrady. Biraq ketip qalǵan I. otyrystaǵy bir dosyna «men bireýlermen sózge kelip qaldym, osyndaı kóshege kelshi» dep telefon shalady. Bul habardy estigen 7 adam 3 kólikkke minip, atalǵan kóshege barady.
Ol jerge kelgende I.-dan basqa eshkim bolmaı shyǵady. Onyń aıtýynsha, onymen eregisken adamdar Sadovaıa kóshesine qaraı ketken. Sodan keıin, ol bir dosymen birge avtokólikterdiń bireýine minip óziniń úı jaǵyna barýdy suraıdy. Úıiniń aýlasyna kirip shamaly ýaqyttan keıin qolyna sholaq myltyq alyp shyǵady. Ony kórgen dostary qorqyp ketip, oǵan urysady. Alaıda, ol «myltyqta patron joq jáne ony ásheıin qorqytý úshin aldym» deıdi. Sóıtip, kólikke minip, kóshe boıynda kele jatqanda, olardy basqa mashına ozyp ketedi. Odan ári eki kólik te qatarlasyp kele jatqan kezde sottalýshy I. sholaq myltyqpen qasyndaǵy kólikke baǵyttap 2 márte atady. Oqtyń bireýi avtokólikti basqaryp kele jatqan júrgizýshiniń basyna tıedi. Alǵan aýyr jaraqattan ol, esin jımastan, aýrýhanada qaıtys boldy.
Sot otyrysynda sottalýshy I. kinásin moıyndaǵan joq, al qalǵan eki sottalýshy jasalǵan asa aýyr qylmysty bile tura quqyq qorǵaý organdaryna habarlamaǵandaryna ókinip, keshirim surady.
Jábirlenýshi, qaıtys bolǵan adamnyń ákesi, sottalýshylarǵa zańǵa sáıkes qatań jaza taǵaıyndaýdy jáne olardan moraldyq jáne materıaldyq zalaldy óndirýdi surady.
Qyzylorda oblysynyń qylmystyq ister jónindegi mamandandyrylǵan aýdanaralyq sotynyń úkimimen sottalýshy I. asa aýyr qylmys jasaǵan úshin, atap aıtqanda, adam óltirgen jáne zańsyz qarý alyp júrgen úshin kináli dep tanylyp 18 jylǵa bas bostandyǵynan aıyryldy. Jazasyn qatań rejımdegi túzeý kolonııasynda óteý belgilendi.
Qalǵan eki sottalýshy asa aýyr qylmys jasalǵanyn bile tura ol týraly tıisti organdarǵa habarlamaǵany úshin kináli dep tanylyp, 5 jylǵa bas bostandyqtarynan shekteldi. Úkim zańdy kúshine engen joq.
