«Adaldyq dúkenderi» alaqol satyp alýshylardyń kesirinen bankrotqa ushyrap jatyr

NUR-SULTAN. QazAqparat - Elimizdiń óńirlerine satýshysy joq 3,5 myń «Adaldyq dúkeni» ashylǵan. Bul týraly búgin «Jemqorlyqtan azat óńirler» jobasynyń jetekshisi Janar Taıjanova aıtty, dep habarlaıdy QazAqparat tilshisi.

«Ókinishke oraı azamattar dárigerge barǵany úshin, emtıhandy sátti tapsyrǵany úshin, qandaı da bir jumysyn jedel bitirgeni úshin, memlekettik organda qandaı da bir qujat alǵany úshin «rahmetin» bildirý norma dep sanaıdy. Bul durys emes. Biraq, bizdiń adamdar ýaqytyn joǵaltpaý úshin, kezekte turmaý úshin kez kelgen nársege tólem jasaýǵa daǵdylanyp alǵan. Bizdiń eń birinshi mindetimiz - qoǵamnyń turmystyq jemqorlyqqa kózqarasyn ózgertý», - dedi ol.

Onyń aıtýynsha, «Jemqorlyqtan azat óńirler» jobasy bul baǵyttaǵy jumystaryn «Adaldyq dúkenderin» ashýdan bastaǵan.

«Búgingi kúni búkil elimizde adamdardy jemqorlyqqa múldem tózbeýshilikke tárbıeleýi tıis 3,5 myńnan astam «Adaldyq dúkenderi» quryldy. Joba ıdeıasyna oraı satýshysy joq dúkenge kelgen adam ózine qajetti taýardy alǵannan keıin aqshany kassa apparatynyń ornyn basatyn arnaıy jáshikke salyp ketedi. Bul adamdardy adaldyqqa tárbıleýi tıis. Sebebi adam óz ar-uıatymen jalǵyz qalady», - dedi J.Taıjanova.

Degenmen, joba jetekshisiniń aıtýynsha, keıbir óńirlerdegi «Adaldyq dúkenderi» satyp alýshylardyń alǵan zatyna tólem jasamaýy saldarynan bankrotqa ushyraǵan.