«Adaldyq alańy» jobalyq keńseleriniń áleýeti jetkilikti paıdalanylmaı otyr – Shpekbaev
Agenttik aqparatyna sáıkes, Memleket basshysynyń tapsyrmasyn oryndaý maqsatynda Sybaılas jemqorlyqqa qarsy is-qımyl agenttiginiń tóraǵasy Alık Shpekbaev mınıstrlikterdiń jaýapty hatshylarymen jáne «Adaldyq alańy» jobalyq keńseleri basshylarynyń qatysýymen turmystyq sybaılas jemqorlyqty joıý máseleleri boıynsha keńes ótkizdi.
Sondaı-aq keńeske ortalyq memlekettik organdardyń aýmaqtyq bólimsheleriniń basshylary, ákimdikterdiń ókilderi jáne Ádep jónindegi ýákilderi qatysty.
Keńes barysynda A.Shpekbaev «Adaldyq alańy» jobalyq keńseleriniń áleýeti jetkilikti paıdalanylmaı otyrǵanyn atap ótti. 2019 jyly ashylǵan jobalyq keńseniń maqsaty – turmystyq sybaılas jemqorlyqty joıý, memorgandardyń ashyqtyǵy men eseptiligin qamtamasyz etý jáne sybaılas jemqorlyqqa qarsy is-qımylda qoǵamdyq baqylaýdy kúsheıtý.
Onyń aıtýynsha, jobalyq keńseler bıýdjet qarajatynyń jumsalýyn baqylaýǵa, sybaılas jemqorlyq táýekelderin boldyrmaýǵa jáne memlekettik qyzmetterdi tsıfrlandyrýdy jedeldetýge, open space jáne front-keńselerdi engizý arqyly jemqorlyqqa qarsy bastamalardyń generatory bolýy tıis.
Óz kezeginde Elbasy N.Á. Nazarbaevtyń «Sybaılas jemqorlyqtan ada óńirler» bastamasyn iske asyrýdyń oń mysaly retinde Qazaq memlekettik zań ýnıversıtetiniń provosty S.G. Pen basshylyq etetin Bilim jáne ǵylym mınıstrliginiń «Adal bilim» jobalyq keńsesiniń tájirıbesi atap ótildi.
A.Shpekbaev shara sońynda qatysýshylardy turmystyq sybaılas jemqorlyqty joıý boıynsha ázirlenip jatqan jol kartasyna usynystar engizýge shaqyrdy. Sondaı-aq sybaılas jemqorlyqqa qarsy sharalardy qabyldamaǵany úshin jaýapkershilik týraly eskertildi.
Esterińizge sala keteıik, buǵan deıin Memleket basshysy sybaılas jemqorlyqty azaıtý boıynsha laıyqty bastamalary joq basshylar týraly baıandaýdy tapsyrǵan bolatyn.