Adaldyq bolǵan jerde ádil qoǵam ornaıdy - Aıdar Qojabaev
KÓKShETAÝ. KAZINFORM – Aqmola oblysy ishki saıasat basqarmasynyń janyndaǵy «Qoǵamdyq damý ortalyǵy» mekemesiniń qyzmetkerleri Memleket basshysy Qasym-Jomart Toqaevtyń «Ádiletti Qazaqstan – Adal azamat» jobasy aıasynda Zerendi aýdanynyń Aıdarly jáne Vıktorovka aýyldarynda bolyp, kóshpeli jıynyn ótkizdi.
Sharaǵa «Qoǵamdyq damý ortalyǵy» mekemesiniń qyzmetkerlerinen bólek, Shoqan Ýálıhanov atyndaǵy Kókshetaý ýnıversıtetiniń ǵalym-ustazdary Raýshan Júsipova men Ǵalymtaı Tólepbergenov qatysyp, el turǵyndaryna Prezıdenttiń Joldaýyndaǵy negizgi baǵyttardy túsindirdi. Elimizdiń áleýmettik-ekonomıkalyq damýy, ulttyń jańa sapasyn qalyptastyrý, Prezıdenttiń úkimetke tapsyrǵan negizgi baǵyttary tárizdi birqatar túıitkildi máseleler aıtyldy.
«Memleket basshysy Qasym-Jomart Toqaev óz sózinde «Ádiletti Qazaqstandy Adal azamattar qurady. Bul – bir-birimen óte tyǵyz baılanysty uǵymdar» dep aıtqan edi. Prezıdent adal azamatty sıpattaı kele, ondaı jannyń boıynda otanshyldyq, adamgershilik, bilimpazdyq, kásibılik, únemshildik, eńbekqorlyq, el men jerge janashyrlyq sııaqty asyl qasıetter bolýy kerek dedi. Ózderińiz biletindeı ek-úsh jyldyń ishinde elimizde ózin-ózi basqarýdy damytý tujyrymdamasy, konstıtýtsııalyq reformalar, aýyldyq okrýgter, aýdandar ákimderin saılaý, depýtattardy saılaý engizildi. Osynyń barlyǵy elimizdiń keleshegi, azamattarymyzdyń ál-aýaqty úshin jasalyp otyrǵan qadamdar ekeni sózsiz. Prezıdent aıtqandaı, ár salada adaldyq basty orynda tursa, ádil qoǵam ornaıtyny sózsiz. Al ádil qoǵamda jemqorlyqqa jol berilmeıdi, el múddesine qaıshy sheshimder shyǵarylmaıdy. Árıne, munyń bári birden bolmaıdy. Bul memlekettik organdardyń da, qoǵamnyń da jumysy. Búgingi sizdermen ótkizip otyrǵan kezdesýimizdiń máni de sol», - dedi óz sózinde «Qoǵamdyq damý ortalyǵy» mekemesiniń basshysy Aıdar Qojabaev.
Sonymen birge, jıynda aýyl turǵyndary ózderin tolǵandyryp júrgen egistik jerler, mal jaıylymy, aýyz sý, balalardyń oıyn alańdary, jol, kópir tárizdi kóptegen máselelerdi kóterip, bıliktiń nazary qajet ekenin aıtty.
Jıyn sońynda búginde qoǵamǵa óz paıdasyn tıgizip júrgen aýyldyń belsendi azamattary Alǵys hatpen marapattaldy.
Aıta ketsek, budan buryn Aqmola oblysynyń eginshileri kúzgi astyq jınaý naýqanyna kiriskenin jazǵan edik.
