«Adal júrek» qaıyrymdylyq jobasy: Aqmolalyq otbasy baspanaly boldy

KÓKShETAÝ. QazAqparat – Aqmola oblysynda Táýelsizdiktiń 30 jyldyǵy qarsańynda «30 qaıyrymdy is» aktsııasy jáne «Adal júrek» jobasy arqyly aqmolalyq otbasy baspanaly boldy, dep habarlaıdy QazAqparat tilshisi.

Quny 5 mıllıon teńge turatyn úsh bólmeli páterdiń kilti Ereımentaý aýdanyndaǵy Kenjebaevtar otbasyna tapsyryldy.

«Biz Qazaqstannyń ár óńirinen jınalyp, osyndaı qaıyrymdylyqty maqsat etip «Adal júrek» degen jobany iske asyrýǵa bel býdyq. Biz – 25 adam qolymyzdan kelgenshe halyqty meırimdilikke úgittep, qoǵamdyq oryndarda jáshikter qoıyp, ózderimiz de shama kelgenshe osy qaıyrymdy sharaǵa atsalysýǵa halyqty shaqyryp, qomaqty soma jınadyq. Jınalǵan aqshany tek muqtaj jandarǵa úlestirip, osy Ereımentaý aýdanynda turatyn Kenjebaevtar otbasyna páter alýdy sheshtik», - dedi joba qatysýshysy.

Aqmola oblystyq ishki saıasat basqarmasynan atap ótkendeı, atalmysh shara Egemendi eldiń yntymaǵyn tanytyp, adamı qasıettiń shyńy bolǵan «qaıyrymdylyq» syndy qundylyqtyń aıqyn kórinisi.

«Óte qýanyshtymyz! Kútpegen jerden baspanaly boldyq. «Adal júrek» jobasyn uıymdastyrǵan adamdarǵa myń alǵys aıtamyn. Kóp rahmet!», - dep rızashylyq bildirdi Kenjebaevtar januıasynyń otanasy.