«Adal joldy tańdaımyz» marafony: Saryaǵashtyqtar estafetany qazyǵurttyqtarǵa tabystady

SARYAǴASh. QazAqparat – Túrkistan oblysy Saryaǵash aýdanynda Jastar jylyna oraı jáne sybaılas jemqorlyqqa qarsy uıymdastyrylǵan «Adal joldy tańdaımyz» atty jastar marafon-estafetasy óz máresine jetti. Elimizdiń sybaılas jemqorlyqqa qarsy is-qımyl Agenttiginiń bastamasymen jáne aýdan ákimshiliginiń uıymdastyrýymen ótken shara endi Qazyǵurt aýdanynda jalǵasatyn boldy, dep habarlaıdy QazAqparat tilshisi.

Jastar marafon-estafetasyn Qazyǵurt aýdanyna tapsyrý rásimine aýdan ákimi Muhıt Otarshıev pen Qazaqstan Respýblıkasynyń sybaılas jemqorlyqqa qarsy is-qımyl agenttiginiń Túrkistan oblysy boıynsha departamentiniń Saryaǵash aımaǵy boıynsha aýdanaralyq basqarmasynyń basshysy S.Jantóreev, Qazyǵurt aýdanynan kelgen arnaıy delegatsııa ókilderi men jergilikti turǵyndar qatysty. Marafon qorytyndysymen «Jastar týy» men fotoalbomǵa tilekter jazylyp, fotosýrettermen tolyqtyryldy. Sóıtip saltanatty túrde Qazyǵurt aýdanyna berildi.

Aıta keteıik, marafonnyń negizgi maqsaty jastar arasynda sybaılas jemqorlyqqa qarsy mádenıetti qalyptastyrý bolyp tabylady. 11 qazannan bastaý alǵan marafon aıasynda Saryaǵash aýdanynda túrli formattaǵy is-sharalar ótti. Atap aıtqanda, esse konkýrstar men ıntelektýaldy oıyndar, beınejazba jáne vaın baıqaýlary, pikirtalas jáne breıng-rıng týrnırleri, KVN men flesh-mobtar uıymdastyryldy. Sondaı-aq, avtokerýen men dóńgelek ústelder, konferentsııalar men semınarlar, biryńǵaı tárbıe saǵattary men, jastar tárbıesi máseleleri boıynsha kezdesýler, teatrlandyrylǵan qoıylymdar, sporttyq is-sharalar jáne t.b. barlyǵy 410 is-shara ótkizilip, oǵan 21 myńnan astam jas qatysty.