«Adal jol - Chestnyı pýt» marafony: 18 myńnan astam aqmolalyq qatysty

KÓKShETAÝ. QazAqparat - Aqmola oblysynda 18 myńnan astam adam qatysqan sybaılas jemqorlyqqa qarsy «Adal jol - Chestnyı pýt» marafony ótti, dep habarlaıdy QazAqparat tilshisi óńirlik sybaılas jemqorlyqqa qarsy kúres departamentiniń baspasóz qyzmetine silteme jasap.

«Atalmysh marafon Aqmola oblysynda osymen besinshi jyl ótýde. Aǵymdaǵy jyly marafon 1 naýryzda Kókshetaý qalasynan bastaldy. Búgingi kúni marafon Kókshetaý jáne Stepnogor qalalarynda, Eńbekshilder, Býrabaı, Bulandy, Aqkól, Shortandy, Ereımentaý, Arshaly, Tselınograd, Qorgaljyn, Birjan sal aýdandarynda ótip, oǵan on segiz myńnan astam aqmolalyq qatysty. Búgin marafonnyń estafetasy Astrahan aýdanyna jiberildi», deıdi vedomstvodan.

Marafon sheńberinde túrli formatta 268 is-shara ótkizildi. Olardyń ishinde breın-rıngter, event-kezdesýler, sýretter men beınerolıkter baıqaýlary, debattar, fleshmobtar, avtosherýler, trenıngter, kezdesýler, dárister men semınarlar uıymdastyryldy.

«Marafonnyń basty maqsaty – jemqorlyqqa qarsy qozǵalysqa barsha aqmolalyqtardy tartý, jemqorlyqqa qarsy iste qoǵam men memlekettiń kúshin biriktirý, jemqorlyqqa qarsy mádenıetti jáne oǵan tózbeýshilik ustanymyn qalyptastyrý. Búgingi tańda marafon respýblıka boıynsha barlyq oblystarda ótkizilýde, biraq bastapqyda ol Aqmola oblysynda 2015 jyly bastaý alǵanyn atap ótken jón. Jergilikti halyqtyń kórsetken qoldaýy onyń elimizdiń basqa óńirlerinde jalǵasýyna óz septigin tıgizdi», dep tolyqtyrdy vedomstvodan.

Marafonnyń jumysy jeltoqsan aıynda Halyqaralyq jemqorlyqqa qarsy kúres kúnine oraı uıymdastyrylatyn forýmmen aıaqtalady. Forýmda marafonnyń jeńimpazdary men belsendi qatysýshylary marapattalady.