«Adal» partııasy Shymkent qalasy men Túrkistan oblysynda fılıaldaryn tirkedi
«QR Azamattyq kodeksiniń 42-babyna sáıkes, zańdy tulǵalar ataýyn ózgertken kezde memlekettik tirkeýden qaıtadan ótýi qajet. Olardyń fılıaldary da eseptik qaıta tirkelýi tıis. Osy jyldyń 11 qarashasynda «Birlik» saıası partııasy «Adal» saıası partııasy retinde memlekettik qaıta tirkeýden ótti. «Adal» saıası partııasynyń barlyq 17 fılıaly tıisti eseptik qaıta tirkeýge alyndy. Osylaısha olardyń barlyq 17 óńirde fılıaly bar», - dedi ol Ortalyq saılaý komıssııasy otyrysynda.
Sonymen qatar Azamat Ámirǵalıev Qazaqstannyń kommýnıstik halyq partııasy osy jyldyń 12 qazanynda Qazaqstannyń halyq partııasy retinde qaıta tirkeýden ótkenin atap ótti. Barlyq óńirlerdegi fılıaldary da tirkelgenin aıtty.
«Búgingi kúni partııalardy tirkeý protsedýrasy aıaqtaldy», - dedi Ádilet vıtse-mınıstri.
Osy rette Ortalyq saılaý komıssııasynyń tóraǵasy Berik Imashev «Adal» saıası partııasynyń óńirlik fılıaldaryna qatysty aqparatty naqtylaýdy ótindi.
«Siz «Adal» saıası partııasynyń barlyq óńirde fılıaly bar deısiz. Shymkent qalasy men Túrkistan oblystyq fılıaldaryna qatysty aqparat berseńiz. Buǵan deıin atalǵan óńirlerde fılıaldary bolmaǵan edi», - dedi ol.
Óz kezeginde QR Ádilet vıtse-mınıstri «Adal» saıası partııasy Shymkent qalasy men Túrkistan oblysynda fılıalyn tirkegendigin atap ótti.
Buǵan deıin «Adal» saıası partııasynyń tıisti fılıaldary bolmaǵandyqtan, Shymkent qalasy men Túrkistan oblysy máslıhattary depýtattaryn saılaýǵa qatysa almaıtyndyǵyn habarlaǵan edik.
