Adal kásipkerge erekshe nazar aýdarylýy kerek - Tımýr Qulybaev
TALDYQORǴAN.QazAqparat - Óz isine adal kásipker memlekettiń, baspasóz ben qoǵamnyń erekshe nazarynda bolýy kerek. Bul pikirdi «Atameken» QR Ulttyq kásipkerler palatasynyń tóralqa tóraǵasy Tımýr Qulybaev Taldyqorǵanda ótken jıyn barysynda málim etti, dep habarlaıdy QazAqparat «Atameken» UKP baspasóz qyzmetine silteme jasap.
«Biz QR Bas prokýratýrasymen memlekettik organdardyń baqylaý-qadaǵalaý qyzmetin azaıtýǵa qatysty mańyzdy jumysty jalǵastyramyz. Kásipkerge qatysty júrgiziletin 28 myń baqylaý-qadaǵalaý qyzmetiniń úshten eki bóligi qysqartylady, qalǵany, bıznes múddesine ákimshilendiriledi. Biz adal kásipkerdiń memlekettik saıasattyń ortasynda bolǵanyn qalaımyz. Adal kásipker memlekettiń qamqorlyǵyna alynýy kerek. Mundaı kásipkerge baspasózdiń de, qoǵamnyń da nazary aıryqsha bolýy tıis», - dedi Tımýr Qulybaev.
Ulttyq palatanyń tóralqa tóraǵasy Elbasynyń qoldaýymen «Atameken» UKP adal kásipkerlerdiń bıznesti júrgizýine ońtaıly jaǵdaıdy qamtamasyz etý úshin jáne shaǵyn jáne orta bıznesten túsetin salyq aýdarymdarynyń bóligi sol óńirde qalý úshin qoldanystaǵy Salyq kodeksine ózgertý engizýge qatysty jumysty qarqyndy júrgizip jatqanyn aıtty. Bul tıisinshe jergilikti bılikti bıznesti damytýǵa jaǵdaı jasaýǵa yntalandyrady.
«Biz salyq ákimshiligine qatysty máseleler týyndaıtynyn kásipkerlerden keletin kóptegen ótinimnen baıqadyq. Kásipkerlerdi zańsyz tekserýlerden, salyq organdarynyń sotynda nemese basqa da sotta óz múddelerin qorǵaý qajettiliginen shekteý kerek. Osy maqsatta mınıstrlikterge óz usynystarymyzdy berdik. Ulttyq palata saraptamalyq pikir bildirip, sotta qorǵaıdy jáne adal kásipkerlerdi qoldaý jumysyn jalǵastyra beredi», - dep naqtylady Tımýr Qulybaev.
Almaty oblysynda kásipkerliktiń 118 myń sýbektisi jumys isteıdi, onyń ishinde 97 myńy, ıaǵnı 82%-y aýyldyq jerde.
Aıta ketý kerek, búgin «Atameken» QR Ulttyq kásipkerler palatasynyń tóralqa tóraǵasy Tımýr Qulybaev jumys saparymen Almaty oblysyndaǵy kásiporyndarǵa baryp, óńirdegi máselelerin talqylaý úshin kásipkerlermen kezdesti. Qulybaev Taldyqorǵanda oblys ákimi Amandyq Batalov, Óńirlik keńes músheleri, quqyq qorǵaý organdarynyń basshylary, bıznes-qaýymdastyqtar, bankter men qarjylyq ınstıtýttardyń ókilderi jáne taýar óndirýshilerdiń qatysýymen keńeıtilgen jıyn ótkizdi.
