«ADAL CAMP» jazǵy lageri – jastarǵa serpin bergen eki kún
ASTANA. KAZINFORM - 20-21 tamyz kúnderi Terekti aýdany, Saryómir aýylyndaǵy «Jas ulan» lagerinde sybaılas jemqorlyqtyń aldyn alýǵa baǵyttalǵan jas mamandarǵa arnalǵan «ADAL CAMP» jazǵy lageri ótti.
Eki kúnge sozylǵan sharaǵa aýdan boıynsha 40 jas qatysty. Olardyń qatarynda jas memlekettik qyzmetkerler, jastar resýrstyq ortalyǵynyń mamandary jáne belsendi jastar bar. Lagerdiń negizgi maqsaty – qoǵamda sybaılas jemqorlyqqa qarsy mádenıetti qalyptastyrý, parasattylyq pen ádildikti nasıhattaý boldy.
Alǵashqy kúni qatysýshylar tanysý jáne komanda qurý trenınginen bastady. Jastar saıasatynda jemisti qyzmet etip júrgen kóshbasshy jastar oblystyq qoǵamdyq damý basqarmasynyń bólim basshysy M.Bısekenov, oblystyq JRO basshysy A.Ibraev, «Jastar rýhy» JQ BQO fılıaly tóraǵasy A.Islamǵalıev jáne Oral qalalyq JRO basshysy, memlekettik «Daryn» jastar syılyǵynyń ıegeri D.Júsipqalıevtiń qatysýymen motıvatsııalyq kezdesý ótkizildi. Sonymen qatar jastar «Qazaqsha quiz» ıntellektýaldyq oıynynda bilimderin synady. Lager qatysýshylaryna QR Memlekettik basqarý akademııasynyń BQO fılıalynyń treneri S.Kýjbanova «Ashyqtyq jáne senim: jeke ári komandalyq jaýapkershilik daǵdylary» taqyrybynda trenıng ótkizdi. Keshkisin ashylý saltanatyna arnalǵan kontsert uıymdastyrylyp, artynsha aýdan ákimi Á.Muhanbetjanova men BQO Sybaılas jemqorlyqqa qarsy is-qımyl agenttiginiń BQO boıynsha departament basshysynyń birinshi orynbasary M.Qasymov jastarmen erkin formatta suhbat qurdy.
Lagerdiń ekinshi kúni tańǵy jattyǵýdan bastalyp, sporttyq jarystar (fýtbol, voleıbol, arqan tartý) uıymdastyryldy. Jastar demalyp qana qoımaı, Shalqar kóli jaǵasynda ekologııalyq aktsııa ótkizip jaǵalaýdy tazartýǵa úlesterin qosty. Eki kúndik mazmundy baǵdarlamanyń sońynda qorytyndylaý rásimi ótkizilip, belsendi qatysýshylarǵa arnaıy sertıfıkattar tabys etildi.
«ADAL CAMP» lageri jas mamandardyń bir-birimen tájirıbe almasýyna, oı-órisin keńeıtýine jáne eń bastysy – ádildik pen adaldyq qundylyqtaryn boıyna sińirýine úlken múmkindik berdi.