«Adal bilim – adal urpaq»: Bilim salasynda adaldyq qaǵıdattary qatańdaıdy
ASTANA. KAZINFORM — Endi elimizdiń bilim salasynda adaldyqty saqtaý qaǵıdattary qatańdaıdy. Bul týraly «Adal bilim – adal urpaq» atty respýblıkalyq forýmda QR Memlekettik qyzmet isteri agenttiginiń tóraǵasy Darhan Jazyqbaı málimdedi.
Agenttik tóraǵasynyń aıtýynsha, bul baǵytta bilim berý uıymdaryn tsıfrlandyrý jańa deńgeıde júzege asady.
– Ózderińiz biletindeı, biryńǵaı kadrlyq júıesin engizip jatyrmyz. Biz bilim salasyndaǵy múddeler qaqtyǵysyn da kórip otyrmyz, kadrdaǵy týystyq qatynastardy da kórip otyrmyz, basqa da máselelerdi qarap otyrmyz. Osynyń barlyǵy aldaǵy ýaqytta bolmaýy men ashyqtyqty qamtamasyz etýi úshin tolyqtaı tsıfrlyq júıege kóship, tsıfrlyq HR protsesterdi kóbirek qabyldaý qajet, – deıdi Darhan Jazyqbaı.
Endi JOO-daǵy ashyqtyqty qamtamasyz etý úshin barlyq bilim uıymdaryna birdeı standart bekitilmek.
– Elimizde memlekettik qyzmetterdiń 92 paıyzy tsıfrlanǵanyn bilesizder. Biraq bul baǵytta ár bilim berý uıymynyń deńgeıi ártúrli. Mysaly, bir ýnıversıtet tsıfrlandyrý boıynsha alǵashqylardyń biri bolyp, jataqhana bólmelerin berý tártibin tsıfrlandyrsa, basqa ýnıversıtet bul protseske ilese almaı qalady. Sondyqtan barlyq ýnıversıtet úshin ortaq standarttar jasap, olardy engizý qajet, – deıdi Kazinform tilshisine bergen suhbatynda QR Memlekettik qyzmet isteri agenttigi tóraǵasynyń orynbasary Salaýat Múksimov.
Respýblıkalyq forýmǵa Ǵylym jáne joǵary bilim mınıstri Saıasat Nurbek pen Oqý-aǵartý mınıstri Juldyz Súleımenova da qatysty. Sondaı-aq, orta bilim berý uıymdarynyń ókilderi, sarapshylar qaýymdastyǵy men memlekettik organdardan 300-den astam adam jınaldy.
Іs-shara barysynda Memlekettik qyzmet isteri agenttigi, Ǵylym jáne joǵary bilim, Oqý-aǵartý mınıstrlikteri men Akademııalyq adaldyq lıgasy bilim berýde akademııalyq adaldyqty qamtamasyz etý jónindegi memorandýmǵa qol qoıyldy. Sonymen qatar memorandýmdy iske asyrýdyń 2026 - 2027 jyldarǵa arnalǵan Jol kartasy bekitildi.
Eske sala keteıik, Memleket basshysy 2021 jyly Úkimettiń keńeıtilgen otyrysynda joǵary oqý oryndarynda akademııalyq adaldyqty buzý derekterine jáne jemqorlyq kórinisterine jol bergen jaǵdaıda lıtsenzııadan aıyrýǵa deıingi qatań jaýapkershilik engizýdi tapsyrǵan bolatyn.
Buǵan deıin Astanada lıtsenzııasyz jumys istegen jeke mektepke aıyppul salynǵany týraly jazǵan edik.