«Adal azamat» tárbıe baǵdarlamasy barlyq bilim berý uıymyna engiziledi

ASTANA. KAZINFORM – Aldaǵy ýaqytta «Adal azamat» tárbıe baǵdarlamasy elimizdegi barlyq memlekettik bilim berý uıymyna engiziledi. Bul týraly Ortalyq kommýnıkatsııalar qyzmetindegi brıfıngte Oqý-aǵartý vıtse-mınıstri Edil Ospan aıtty.

- 14 naýryzda Býrabaıda ótken Ulttyq quryltaıdyń ІV otyrysynda Memleket basshysy «Tárbıesiz berilgen bilim – adamzattyń qas jaýy». Sondyqtan bilimmen qatar tárbıege aıryqsha nazar aýdarý óte mańyzdy ekenin atap ótip, quryltaı músheleri aldaǵy ýaqytta osy baǵdarlamany «Adal azamat» dep ataýdy usynǵanyn jáne bul usynyspen tolyq kelisetinin qadap aıtty. Aldaǵy ýaqytta «Adal azamat» tárbıe baǵdarlamasy elimizdegi barlyq memlekettik bilim oshaǵynda, onyń ishinde barlyq jekemenshik bilim berý uıymdaryna engizilip, iske asyrylatyn bolady, - dedi ol.

Vıtse-mınıstrdiń aıtýynsha, «Adal azamat» baǵdarlamasynyń túpki maqsaty – qoǵamnyń myzǵymas tiregi, otanshyl, bilimdi, jasampaz urpaq tárbıeleý, ádilettiliktiń, adamgershiliktiń, jaýapkershilik pen eńbeksúıgishtiktiń aıqyn beınesi bolatyn adal azamat qalyptastyrý.

- «Adal azamat» birtutas tárbıe baǵdarlamasy tek qana bilim berý uıymdaryndaǵy ǵana emes, barlyq memlekettik uıymdardaǵy tárbıe jumysyna qatysty is-qımyldyń negizine aınalady. Sondyqtan Oqý-aǵartý mınıstrligi osy jumystardy baǵdarlama aıasynda birizdendirip jatyr. Baǵdarlama mazmunyna sáıkes bilim uıymdaryndaǵy tárbıe protsesi qundylyqqa jáne quzyrettilikke baǵdarlanǵan tásilder arqyly iske asyrylady, - dedi Edil Ospan.