«Adal azamat»: Qazaqstan mektepteri zamanaýı formatta bezendirilip jatyr
ASTANA. KAZINFORM — «Adal azamat» birtutas tárbıe baǵdarlamasyn kórneki súıemeldeý maqsatynda zamanaýı brendbýk ázirlendi, dep habarlaıdy QR Oqý-aǵartý mınıstrliginiń baspasóz qyzmeti.
Qujatta baǵdarlamanyń negizgi qundylyqtary men ıdeıasyn aıqyndaıtyn kórneki shyǵarmashylyq stılder, túster palıtrasy, maketter jáne mektep keńistigin zamanaýı formatta bezendirýge arnalǵan elementter usynylǵan.
— Baǵdarlama mazmunyna sáıkes bilim berý uıymdary úshin biryńǵaı dızaın-kod qalyptastyrylyp, mektepterdiń ishki keńistigin brendbýk talaptaryna saı kezeń-kezeńimen bezendirý jumystary júrgizilip jatyr. Dızaın-kod mazmunynda baǵdarlamanyń 6 negizgi qundylyǵyn aıshyqtaıtyn bezendirý úlgileri bar. Zamanaýı brendbýk aıasynda pán kabınetteri oqýshylardyń jas erekshelikterine jáne pán baǵytyna sáıkes bezendirilýi qajet, — delingen habarlamada.
Jergilikti atqarýshy organdardyń derekterine sáıkes bastapqy kezeńde brendbýk 530 bilim berý uıymynda engiziledi. Qazirgi ýaqytta 267 mektepte kórneki elementterdi ornalastyrý jumystary aıaqtaldy. Aldaǵy ýaqytta dızaın-kod renovatsııa baǵdarlamasy aıasynda jóndeý jumystary júrgiziletin mektepterde engizilip, keıin kezeń-kezeńimen elimizdiń barlyq bilim berý uıymdaryna taratylatyn bolady.
Aıta keteıik, brendbýk dınamıkalyq qujat sanalady jáne bilim berý uıymdarynyń erekshelikterine sáıkes únemi tolyqtyrylyp, jetildirilip otyrady.
Osydan buryn Memlekettik keńesshi Erlan Qarın «Adal azamat» baǵdarlamasy jekemenshik mektepterdi de tolyq qamtýy tıis ekenin aıtty.
