«Adal azamat» baǵdarlamasynyń dızaın-kody barlyq mektepke engiziledi
ASTANA. KAZINFORM — Bıyl Ekologııalyq aǵartý jumysynyń biryńǵaı standarty qabyldanady. Bul týraly búgin Úkimet otyrysynda Oqý-aǵartý mınıstri Juldyz Súleımenova aıtty.
— Tárbıe jumysy — jan-jaqty damyǵan, jaýapty ári otanshyl tulǵany qalyptastyrýǵa baǵyttalǵan memlekettik bilim berý saıasatynyń negizgi baǵyttarynyń biri bolyp qala beredi. «Adal azamat» baǵdarlamasynyń biryńǵaı dızaın-kodyn kezeń-kezeńimen engizý elimizdiń barlyq mektebinde jalǵasyn tabady. Onyń maqsaty — zańǵa baǵynatyn, azamattyq jaýakershiligi joǵary adal azamat tárbıeleý. Jyl sońyna deıin «Taza Qazaqstan» jalpyulttyq bastamasy aıasynda Ekologııalyq aǵartý jumysynyń biryńǵaı standartyn qabyldaý jáne engizý josparlanǵan, — dedi mınıstr.
Onyń aıtýynsha, qosymsha bilim berý júıesinde bilim berý, sporttyq jáne shyǵarmashylyq memlekettik tapsyrystardy biryńǵaı tsıfrlyq platformada biriktirgen memlekettik biryńǵaı tapsyrystyń jańa modelin aprobatsııalaý jumystary jalǵasyp jatyr.
— Qyrkúıek aıynan bastap qosymsha bilim berýdi basqarýdyń biryńǵaı tsıfrlyq modeline kóshý maqsatynda joba Aqmola, Jambyl, Túrkistan, Pavlodar jáne Abaı oblysynda kezeń-kezeńimen masshtabtalady, — dedi Juldyz Súleımenova.
Buǵan deıin jańa oqý jylynda oqýshylar qandaı kýrstardy mindetti túrde oqıtynyn jazǵan edik.
