«Adal azamat» baǵdarlamasynyń balalarǵa yqpaly ǵylymı turǵyda zertteledi
ASTANA. KAZINFORM- Oqý-aǵartý mınıstrliginiń ǵylymı qoǵamdastyǵy «Adal azamat» baǵdarlamasynyń balalardyń qundylyqtary men minez-qulqyna yqpalyn zertteý boıynsha ádistemelik usynymdar ázirleıdi. Bul másele Oqý-aǵartý mınıstri Juldyz Súleımenovanyń mınıstrlik pen oǵan vedomstvolyq baǵynysty uıymdardyń ǵylymı qoǵamdastyq ókilderimen kezdesýinde talqylandy.
Mınıstrliktiń baspasóz qyzmetiniń habarlaýynsha, ashyq pikir almasý formatynda ótken kezdesýde baǵdarlamanyń balalarǵa yqpalyn zertteý ádisteri jáne zertteýge elimizdiń barlyq óńirindegi bilim berý uıymdaryn qamtý máseleleri qarastyryldy.
Sondaı-aq oqýlyqtardyń sapasyn arttyrý, olardy ázirleý, saraptaý jáne mektepterde aprobatsııadan ótkizý úderisterin jetildirý joldary talqylandy.
Kezdesýde balalar arasyndaǵy býllıngtiń aldyn alý jáne oǵan der kezinde áreket etý máseleleri de qozǵaldy. Qatysýshylar pedagogter, psıhologter men ata-analardyń birlesken jumysyn tıimdi uıymdastyrýǵa qatysty zertteý usynystaryn ortaǵa saldy.
Kezdesý qorytyndysy boıynsha Oqý-aǵartý mınıstrliginiń ǵylymı qoǵamdastyǵy talqylanǵan máselelerdi ǵylymı turǵyda zertteý jóninde usynymdar ázirleıdi. Bul usynystar aldaǵy kezdesýlerde talqylanyp, mınıstrlik sheshimderinde ǵylymı negizdelgen ádis-tásilderdi qoldaný múmkindikteri qarastyrylady.
Osyǵan deıin QR Vıtse-Prezıdenti Erlan Qarın «Adal azamat» baǵdarlamasynyń mazmunyna ózgerister engizilip jatqanyn aıtqan edi.
