«Adal azamat» baǵdarlamasy ata-analardyń belsendiligin eki esege arttyrdy
ASTANA.KAZINFORM – «Adal azamat» birtutas tárbıe baǵdarlamasy Qazaqstannyń barlyq óńirinde mektep oqýshylarynyń minez-qulqyna oń áserin tıgizip otyr. Bul týraly Y.Altynsarın atyndaǵy Ulttyq bilim akademııasynyń Vıtse-prezıdenti Táńirbergenova Anar Shynbolatqyzy Ortalyq kommýnıkatsııalar qyzmetindegi brıfıngide málimdedi.
Ol óz sózinde «Adal azamat» baǵdarlamasy aıasynda júrgizilgen saýalnama nátıjeleri elimizdiń barlyq aımaǵynda oń úrdisterdi kórsetti dep atap ótti.
– Soltústik Qazaqstan oblysynda respondentterdiń 77 paıyzy, Qostanaı jáne Aqtóbe oblystarynda 75 paıyzy, Shymkent qalasynda 74 paıyzy baǵdarlamanyń oqýshylardyń tártibine oń yqpal etti. Sondaı-aq baǵdarlama oqýshylardyń belsendiligin arttyrýǵa yqpal etip jatyr, - dedi A. Táńirbergenova.
Onyń aıtýynsha, ata-analarǵa pedagogıkalyq qoldaý kórsetý ortalyqtarynyń qurylýy nátıjesinde mektep ómirine tartylǵan ata-analardyń úlesi 42 paıyzdan 82 paıyzǵa deıin ósken.
Baǵdarlama aıasynda óńirlerde mamandar men jekemenshik mektep muǵalimderine arnalǵan oqytý semınarlary uıymdastyrylǵan. Sonymen qatar Astana qalasynda Qazaqstan, Azııa jáne Eýropa elderiniń professorlary men sarapshylarynyń qatysýymen dóńgelek ústel ótip, onda halyqaralyq mamandar biryńǵaı tárbıe berý jónindegi Prezıdenttik bastama – «Adal azamat» birtutas tárbıe baǵdarlamasyna joǵary baǵa berdi.
Spıkerdiń aıtýynsha, bul baǵdarlama júıeli túrde iske asyrylyp jatyr jáne ol muǵalimderdiń kásibı áleýetin damytýǵa, ata-analardy tartýǵa jáne oqýshylar arasynda ulttyq ári azamattyq qundylyqtardy qalyptastyrýǵa aýqymdy úles qosyp otyr.
Buǵan deıin 2023 jyly pılottyq rejımde bastalyp, 2024 jyly barlyq bilim berý uıymdaryna tolyq engizildi. Qazirgi tańda elimiz boıynsha 11 myńnan astam balabaqsha, 8 myńnan asa mektep jáne 700-den astam kolledj bul baǵdarlamany iske asyryp jatqanyn jazǵanbyz.
Sondaı-aq «Birtutas tárbıe» baǵdarlamasy jańa formatta jalǵasatynyn habarladyq.