ACT Creative Tech Week 2026: Qazaqstan men Koreıa sarapshylary bas qosty
ASTANA. KAZINFORM – M.Tynyshbaev atyndaǵy ALT ýnıversıtetinde jasandy ıntellekt, tsıfrlyq tehnologııalar men kreatıvti ındýstrııalardy toǵystyrǵan halyqaralyq bilim berý aptalyǵy — ACT Creative Tech Week 2026 resmı túrde ashyldy.
Saltanatty is-sharaǵa Koreıa Respýblıkasynyń Almaty qalasyndaǵy Bas konsýly Ha Te Ýk, ALT Ýnıversıtetiniń, «Dıalog» aýdarmashylar odaǵynyń, Almaty Creative, Almaty týrızm bıýrosynyń, sheteldik bilim berý jáne tehnologııalyq kompanııalardyń ókilderi, sondaı-aq sarapshylar men joba qatysýshylary qatysty.
ACT Creative Tech Week 2026 qatysýshylardy álemdik kreatıvti jáne tehnologııalyq ındýstrııada qoldanylyp júrgen zamanaýı tájirıbeler men tehnologııalarmen tanystyrady. Baǵdarlama vebtýndar jasaýdan, kıno, anımatsııa jáne jarnama salalarynda jasandy ıntellektti qoldanýdan bastap, óndiristi tsıfrlyq transformatsııalaý men baǵdarlamalaý daǵdylaryn qajet etpeıtin sheshimderdi ázirleýge deıingi baǵyttardy qamtıdy.
ACT Creative Tech Week bilim berý aptalyǵy 2026 jylǵy mamyrda ALT ýnıversıtetiniń bazasynda «Dıalog» aýdarmashylar odaǵymen birlesip ashylǵan Kreatıvti tehnologııalar akademııasynyń (ACT) alǵashqy iri halyqaralyq jobalarynyń biri. Akademııa jasandy ıntellekt, IT jáne kreatıvti ındýstrııalar toǵysyndaǵy mamandardy daıarlaýǵa, zamanaýı tehnologııalarmen tájirıbelik jumys júrgizýge jáne halyqaralyq salalyq sarapshylardy tartýǵa baǵyttalǵan.
Kreatıvti ındýstrııalardy damytý qazirgi ekonomıkanyń perspektıvaly baǵyttarynyń birine aınalyp keledi. Shyǵarmashylyq, tehnologııa jáne kásipkerlik toǵysynda jańa mamandyqtar, ónimder men bıznes-modelder qalyptasyp keledi. Al jasandy ıntellekt pen tsıfrlyq quraldar kontent jasaý jáne zııatkerlik menshikti damytý tásilderin ózgertip jatyr.
Resmı ashylý saltanatynda M.Tynyshbaev atyndaǵy ALT ýnıversıteti dırektorlar keńesiniń tóraǵasy Arslan Seriktegi ACT Creative Tech Week ótkizý Qazaqstan men Koreıa Respýblıkasy arasyndaǵy bilim, ǵylym, ınnovatsııalar jáne jańa tehnologııalar salalaryndaǵy yntymaqtastyqty júıeli túrde damytý jumysynyń jalǵasy ekenin atap ótti.
- Qazaqstan Respýblıkasy men Koreıa Respýblıkasyn kópjyldyq dostyq ári ózara tıimdi qarym-qatynastar baılanystyrady. Eki el arasyndaǵy yntymaqtastyq ekonomıka, ǵylym, bilim, ınnovatsııalar, mádenıet jáne joǵary tehnologııalar salalarynda júıeli túrde damyp keledi. Birlesken jobalar adamı kapıtaldy damytýǵa jáne halyqtarymyz arasyndaǵy gýmanıtarlyq baılanystardy nyǵaıtýǵa yqpal etedi, - dep atap ótti Arslan Seriktegi.
Koreıa Respýblıkasynyń Almaty qalasyndaǵy Bas konsýly Ha Te Ýk ekijaqty yntymaqtastyqty damytýdaǵy tehnologııalyq jáne kreatıvti baǵyttardyń róli artyp kele jatqanyn atap ótti.
- Búginde jasandy ıntellekt, óndiristiń tsıfrlyq transformatsııasy, kreatıvti ındýstrııalar jáne tsıfrlyq kontent sııaqty baǵyttar erekshe mańyzǵa ıe bolyp otyr. Dál osy salalar koreı-qazaqstandyq yntymaqtastyqtyń jańa qozǵaýshy kúshine aınalyp, ekijaqty qarym-qatynastardy sapaly jańa deńgeıge kótere alady, - dedi Ha Te Ýk.
Bas konsýldyń aıtýynsha, jastardyń osyndaı bilim berý bastamalaryna qatysýy erekshe mańyzǵa ıe. Alynǵan bilim, kásibı baılanystar men birlesken jobalar Qazaqstan men Koreıa Respýblıkasy arasyndaǵy yntymaqtastyqty odan ári damytýdyń berik negizine aınalýy múmkin.
ACT Creative Tech Week 2026 baǵdarlamasy tórt baǵytty qamtıdy: Visual Storytelling and Webtoon, kıno, anımatsııa jáne jarnamadaǵy AI Production, Smart Factory & Manufacturing DX jáne No-Code AI Technologies. Qatysýshylarmen Koreıa Respýblıkasy men TMD elderiniń vebtýndar jáne zııatkerlik menshik, jasandy ıntellekt, Smart Factory, tsıfrlyq óndiris jáne No-Code tehnologııalary salasyndaǵy mamandary jumys isteıdi.
Resmı is-sharanyń mańyzdy qorytyndylarynyń biri ALT Ýnıversıteti men Koreıa Respýblıkasynyń YLAB Academy, Yumong Co., Ltd. jáne Smart Maker Platform uıymdary arasynda yntymaqtastyq týraly úsh memorandýmǵa qol qoıylýy boldy.
Kelisimder birlesken bilim berý bastamalaryn damytýǵa, tájirıbe men saraptamalyq bilim almasýǵa, zamanaýı tsıfrlyq tehnologııalardy engizýge jáne kreatıvti ındýstrııalar salasyndaǵy jobalardy júzege asyrýǵa negiz qalaıdy. Bul kelisimder ALT Ýnıversıtetiniń Ońtústik Koreıanyń bilim berý jáne tehnologııalyq uıymdarymen yntymaqtastyǵyn odan ári keńeıtýge múmkindik beredi.
Ashylý saltanaty men memorandýmdarǵa qol qoıý rásiminen keıin Koreıa Respýblıkasynyń Bas konsýly Ha Te Ýk pen qonaqtarǵa ALT Ýnıversıteti boıynsha kampýs-týr uıymdastyryldy. Delegatsııa múshelerine ýnıversıtettiń materıaldyq-tehnıkalyq bazasy, oqý jáne zerthanalyq keńistikteri, zamanaýı jabdyqtary, sondaı-aq bilim berý, ǵylymı jáne tehnologııalyq jobalardy iske asyrýǵa arnalǵan ınfraqurylymy tanystyryldy.
Aıta keteıik, ACT (Academy of Creative Technologies, Kreatıvti tehnologııalar akademııasy) — 2026 jylǵy mamyrda M.Tynyshpaev atyndaǵy ALT Ýnıversıtetiniń bazasynda «Dıalog» aýdarmashylar odaǵy» QB-men birlesip ashylǵan halyqaralyq bilim berý platformasy. Akademııa jasandy ıntellekt, IT jáne kreatıvti ındýstrııalar toǵysyndaǵy bilim berý bastamalaryn biriktiredi.
Aıta keteıik, ALT University nemese M.Tynyshpaev atyndaǵy ALT ýnıversıteti — ýnıversıtettiń resmı ataýy.
ALT abbrevıatýrasy rebrendıng nátıjesinde saqtalyp, joǵary oqý ornynyń burynǵy ataýy Academy of Logistics and Transport (Logıstıka jáne kólik akademııasy) ataýynan shyqqan. Buǵan deıin ýnıversıtet Qazaq kólik jáne kommýnıkatsııalar akademııasy (QazKKA) retinde de belgili bolǵan.
