ÁCh: Shaıbaly hokkeıden Qazaqstan jastar quramasy Danııany jeńdi

Shaıbaly hokkeıden 20 jasqa deıingi Qazaqstan jastar quramasy álem chempıonatyndaǵy ekinshi oıynyn Danııamen ótkizdi, dep habarlaıdy Kazinform.

Qazaqstan quramasy elıtalyq dıvızıonǵa jalǵyz joldamany 10-16 jeltoqsan aralyǵynda IA dıvızıonynda Frantsııa, Danııa, Japonııa, Vengrııa jáne Aýstrııa quramalarymen sarapqa salyp jatyr.

Búgingi kezdesýde eki qurama bir-biriniń qaqpasy mańynda jıi boı kórsetti. Nátıjesinde 15-mınýtta danııalyq Oskar Fısker Molgaard mergendik tanytsa, 44-mınýtta Beıbarys Orazov tarazy basyn teńestirdi.

Al danııalyq Albert Shıoldan 46-mınýtta qaıtadan óz quramasyn alǵa shyǵarsa, qazaqstandyq Kırıll Lıapýnovtyń 48-mınýtta soqqan golynan keıin qaıtadan tarazy basy teńesti.

Qazaqstandyq Rýslan Ospanov 56-mınýtta jeńis shaıbasyn soqty.

Osylaısha Qazaqstan jastary qarsylasynan 3:2 esebimen basym tústi.

Endi olar 13 jeltoqsanda Frantsııamen oınaıdy.

Qazaqstandyq hokkeıshiler álem chempıonaty birinshi dıvızıonynda alty márte oınady. Tórteýinde jeńimpaz atanyp, elıtalyq dıvızıonǵa joldama alǵan edi.

Qazaqstan jastar quramasy elıtalyq dıvızıonda segiz márte baq synady. Joǵary jetistigi – 1999 jyly altynshy oryn.

Eske salsaq, budan buryn qazaqstandyq jastar joldastyq kezdesýde Vengrııa jáne Frantsııa quramalarynan basym tústi.

Sondaı-aq, álem chempıonatynda alǵashqy kezdesýinde Qazaqstan jastar quramasy Vengrııadan basym tústi.